Türkiyə Super Liqasının 21-ci turunda əzəli rəqibi “Samsunspor”la səfər oyununa yollanan “Trabzonspor”un komanda avtobusu daşlı hücuma məruz qalıb.
90plus.az xəbər verir ki, "Trabzonspor" daha əvvəl Kocaeli və Antalyada da oxşar hadisələrlə üzləşdiklərini xatırladaraq, baş verənlərin artıq təsadüfi deyil, açıq şəkildə təşkil olunmuş hücumlar olduğunu bildirib.
Klubun rəsmi açıqlamasında qeyd olunub ki, “Samsunspor” matçı öncəsi baş verən bu hadisə təhlükəli tendensiyanın davamıdır:
“Kocaeli və Antalyadan sonra bu gün Samsunda təkrarlanan bu mənfur əməllər qəbuledilməzdir, görməzlikdən gəlinə və adi hal kimi təqdim edilə bilməz. Bu hücumlar təkcə ‘Trabzonspor’a deyil, bütövlükdə türk futbolunun təhlükəsizliyinə, ədalət anlayışına və nüfuzuna yönəlib.”
Açıqlamada futbolçuların, məşqçi heyətinin və klub əməkdaşlarının can təhlükəsizliyinin açıq şəkildə təhdid altında olduğu vurğulanıb.
Ardıcıl üçüncü hücum
“Trabzonspor” rəhbərliyi ardıcıl üçüncü dəfə yaşanan bu biabırçı hadisələrin normallaşdırılmasına qəti şəkildə icazə verilməyəcəyini bəyan edib. Klub hücumu törədən şəxslər barəsində nümunəvi cəzaların verilməsini tələb etdiyini və prosesin sonuna qədər izləyicisi olacağını ictimaiyyətin diqqətinə çatdırıb.
