Portuqaliya təmsilçisi "Benfika"nın futbolçusu Canluka Prestianni ilə bağlı etdiyi apellyasiya müraciəti təmin olunmayıb. Klubun futbolçuya verilmiş müvəqqəti cəzaya qarşı etdiyi etiraz rədd edilib.
90plus.az xəbər verir ki, bu qərara əsasən, 20 yaşlı argentinalı yarımmüdafiəçi UEFA Çempionlar Liqasının pley-off mərhələsinin ikinci oyununda İspaniya nəhəngi "Real Madrid"ə qarşı keçiriləcək görüşdə iştirak edə bilməyəcək.
Prestianni ötən həftə baş tutan ilk qarşılaşmada "Real Madrid"in braziliyalı cinah oyunçusu Vinisius Juniora qarşı irqçi ifadələr işlətməkdə ittiham olunur. Məhz bu səbəbdən futbolçu barəsində intizam tədbiri görülüb.
UEFA-nın yaydığı rəsmi açıqlamada bildirilir:
“SL Benfika" tərəfindən edilən apellyasiya müraciəti rədd olunmuşdur. Nəticə etibarilə, UEFA Nəzarət, Etika və İntizam Komitəsinin 23 fevral 2026-cı il tarixli qərarı qüvvədə saxlanılmışdır.
Canluka Prestianni, əks halda iştirak etmək hüququ qazanacağı növbəti UEFA klub yarışında müvəqqəti uzaqlaşdırma cəzasını çəkməyə davam edəcək.”
Beləliklə, "Benfika" həlledici qarşılaşma öncəsi ciddi itki ilə üzləşib və komanda "Real Madrid"ə qarşı vacib oyunda əsas oyunçularından birinin xidmətindən yararlana bilməyəcək.
