DÇ-2026: Ukrayna Azərbaycan üzərində çətin qələbə qazandı — Rebrov: “Azərbaycan zəif deyil”.
90plus.az xəbər verir ki, DÇ-2026-nın seçmə mərhələsində Azərbaycan millisi növbəti oyununu keçirib. D qrupunda mübarizə aparan yığmamız Polşanın Krakov şəhərində Ukrayna ilə qarşılaşıb. Görüş meydan sahiblərinin 2:1 hesablı qələbəsi ilə başa çatıb.
Matçdan sonra Ukrayna yığmasının baş məşqçisi Sergey Rebrov mətbuat konfransında jurnalistlərin suallarını cavablandırıb:
“Qələbəyə görə sevinirəm. Bu gün çox gərgin oyun getdi. Hər iki komanda sonadək mübarizə apardı. Beş əsas oyunçumuz zədədən dolayı meydana çıxa bilmədi və bu, bizə çətinlik yaratdı. Azərbaycanı məğlub etmək asan olmadı. Birinci hissədə istədiyimiz oyunu sərgiləməyə çalışırdıq”.
Ukraynalı mütəxəssis Azərbaycanla görüşlərdə komandasının çətinlik çəkməsini belə izah edib:
“Heç vaxt deməmişəm ki, Azərbaycan zəif komandadır. Əksinə, çox yaxşı kollektiviniz var. İslandiya ilə oyunda qazandığınız nəticə təsadüfi deyildi. Mən anlamıram, niyə azərbaycanlılar öz milli komandalarına bu qədər az dəyər verirlər? Axı sizin ölkədə Çempionlar Liqasında çıxış edən komanda var. Azərbaycan futbolçuları bu qarşılaşmaya ciddi hazırlaşmışdı və bu, meydanda hiss olunurdu”.
İslandiya – Fransa matçında qeydə alınan heç-heçə barədə də danışan Rebrov gələcəyə nikbin baxdığını bildirib:
“İndi əsas məqsədimiz zədəlilərin qayıtmasıdır. Beş futbolçumuz komandaya qoşulsa, daha güclü olacağıq. Ukrayna həmişə qələbəyə köklənir. Bu gün İslandiya ilə Fransa arasında bərabərlik oldu, amma biz mübarizəni davam etdirəcəyik və daha yaxşı nəticələr qazanmağa çalışacağıq”.
Sonda Rebrov özünün və komandasının əhval-ruhiyyəsindən danışıb:
“Son iki oyunda qalib gəlmişik. Bu, yaxşı göstəricidir. Ən çox xoşuma gələn odur ki, jurnalistlərdən tənqid deyil, xoş sözlər eşidirəm. Biz azarkeşlərimizi və sizi sevindirmək üçün əlimizdən gələni edəcəyik”.
