Ötən həftə ürəyi ilə bağlı problem yaşayan sabiq “Çelsi” yarımmüdafiəçisi Oskar xəstəxanadan buraxılıb.
90plus.az xəbər verir ki, 34 yaşlı Oskar 11 noyabrda “San Paulu” klubunun təlim-məşq bazasında mövsümöncəsi standard fitnes testləri zamanı velotrenajordan istifadə edərkən özünü pis hiss edib və müvəqqəti olaraq huşunu itirib. Bundan sonra braziliyalı futbolçu “San Paulu”nun Einşteyn xəstəxanasının kardiologiya şöbəsinə yerləşdirilib və həftə boyunca geniş müayinələrdən keçdikdən sonra bazar günü evə buraxılıb.
“Xəstəxanada aparılan geniş araşdırmalar futbolçunun vazovagal sinkopiya epizodu yaşadığını təsdiqləyib”, – klubun açıqlamasında deyilir.
“Yatdığı müddətdə vəziyyəti stabil və klinik olaraq yaxşı idi. Oskar indi bir neçə gün təyin olunmuş tibbi istirahət proqramına əməl edəcək.”
Vazovagal sinkopiya ürək döyüntüsünün və qan təzyiqinin qəfil düşməsi nəticəsində beyinə qan axınının azalması və qısa müddətli huş itirməsi ilə xarakterizə olunur.
Mənbələr ESPN-ə bildiriblər ki, ilkin testlərin nəticələri yaxşı çıxıb və hər şey futbolçunun ürəyinin “salamat” olduğunu göstərir. “Baş verə biləcək bütün pis versiyaların içində bu ən yüngül olanı idi”, – məlumatda qeyd olunur.
Oskar doğma klubu “San Paulu”ya 2024-cü ilin dekabrında, Çində keçirdiyi səkkiz ildən sonra qayıdıb. Onun müqaviləsi 2027-ci ilin sonunda başa çatır.
