“Liverpul”un qələbəsində zədələnən Aleksander İsak əməliyyat olundu.
90plus.az xəbər verir ki, “Liverpul”un “Tottenhem” üzərində 2:1 hesablı qələbəsi ilə başa çatan oyunda zədələnərək meydanı tərk edən isveçli hücumçu Aleksander İsakın ayağında sınıq aşkarlanmışdı. Klubun rəsmi açıqlamasına görə, ulduz futbolçu dünən cərrahi əməliyyat keçirib.
Zədəyə səbəb olan epizodla bağlı “Tottenhem”in müdafiəçisi Mikki van de Ven mövzuya münasibət bildirib. O, İsakı qəsdən incitmək niyyətində olmadığını vurğulayıb.
Premyer Liqada Londonda keçirilən görüşdə hesabı açan Aleksander İsak Van de Venin sərt müdaxiləsindən sonra sol baldır sümüyünün sınığı da daxil olmaqla topuq nahiyəsindən ciddi zədə almışdı. İsveçli forvard bazar ertəsi günü əməliyyat olunub.
“Liverpul”un baş məşqçisi Arne Slot epizodu “ehtiyatsız müdaxilə” kimi dəyərləndirsə də, “Tottenhem”in çalışdırıcısı Tomas Frank bu fikirlə razılaşmayıb.
Sky Sports-a danışan Mikki van de Ven isə hadisədən sonra Aleksander İsakla əlaqə saxladığını bildirib:
“Bəli, ona mesaj yazdım. Çünki onu incitmək istəmirdim. Ayağının mənim ayaqlarımın arasına düşməsi bir qədər bədbəxt an idi. Sonra ona mesaj göndərib tezliklə sağalmasını arzuladım. O da mesajı çox bəyəndi və dərhal cavab yazdı”, – deyə niderlandlı müdafiəçi qeyd edib.
