“Məni alışdırdı!” – “Barselona”nın əfsanəsindən Mourinyo haqqında səs-küylü sözlər gəldi.
90plus.az xəbər verir ki, dünya futbolunun ən səs-küylü və qalmaqallı baş məşqçilərindən biri olan Joze Mourinyo haqqında maraqlı açıqlama gəlib. Bu dəfə Portuqaliyalı mütəxəssisə dair diqqətçəkən fikirləri İspaniya futbolunun əfsanəsi, “Barselona”nın sabiq hücumçusu David Vilya səsləndirib.
“Qvardiola ilə danışanda şoka düşdüm”
David Vilya “Barselona”ya transferi zamanı yaşadığı təəssüratları bölüşərkən baş məşqçi Pep Qvardiola ilə ilk əlaqəsinin detallarını açıqlayıb:
“Qvardiola məni transfer etmək istədiyini deyəndə bunun bir zarafat olduğunu düşündüm və telefonda məşğul olduğumu bildirdim. Sonra Xavini yığdım və soruşdum ki, bu doğrudurmu? O da “bəli” deyəndə dərhal Qvardiolaya geri zəng etdim.”
İspan hücumçu ilk taktiki söhbədən sonra “Barselona”ya tam uyğun olduğunu düşündüyünü və menecerindən yalnız bu təklifi dəyərləndirməsini istədiyini bildirib.
Joze Mourinyonun sözləri onu alışdırıb
David Vilya o dövrdə Joze Mourinyonun rəhbərlik etdiyi “Real Madrid”in “Barselona”nın onun üçün verdiyi böyük məbləğlə bağlı dediklərini unutmadığını bildirib:
“Joze Mourinyo dedi ki, “Barselona” qol vura bilməyən bir hücumçu üçün sərvət xərclədi. Bu sözlər məni alışdırdı! Ardınca biz “Real Madrid”i 5:0 hesabı ilə məğlub etdik və mən 2 qol vurdum.”
“Barselona” karyerası
David Vilya “Barselona”da 2010–2013-cü illər arasında çıxış edib. Bu müddətdə 119 matçda iştirak edərək 48 qol vurub, 24 məhsuldar ötürmə ilə yadda qalıb.
