“Sky Germany”nin jurnalistləri Florian Plettenberq və Philipp Hinzenin son məlumatına görə, “Çelsi” Xavi Simonsa ciddi maraq göstərir.

90plus.az xəbər verir ki, futbolçunun nümayəndələri ilə London klubu arasında artıq danışıqlar başlayıb. Hələlik “Çelsi” ilə Simonsun klubu arasında rəsmi təmas qurulmasa da, tərəflər arasında razılıq əldə olunub-olunmayacağı dəqiqləşdirilməlidir.

Hazırda “Çelsi” holland futbolçunu transfer etmək baxımından ən real variantdır. Premyer Liqanın digər təmsilçisi “Arsenal” da vəziyyəti yaxından izləyir, lakin hələlik aktiv danışıqlar aparmır.

“Bayern Münhen” isə hazırda bu yarışda yoxdur. Amma klubun idman direktoru Maks Eberl prosesi yaxından izləyir və Simonsun “Leypsiq”dən ayrılmaq istədiyindən xəbərdardır.

Qeyd: Niderland yığmasının üzvü artıq “Leypsiq”i bu yay tərk etmək istədiyini klub rəhbərliyinə bildirib. Bundesliqa təmsilçisinin Avropa turnirlərinə vəsiqə qazana bilməməsi onların transfer masasında mövqeyini xeyli zəiflədir. Üstəlik, Simonsun hazırkı müqaviləsinin bitməsinə cəmi iki il qalıb və tərəflərin uzatma niyyəti yoxdur. Bu isə onun gedişini demək olar ki, qaçılmaz edir.

“Leypsiq” bu ilin əvvəlində futbolçuya görə 50 milyon avro (təxminən 41.8 milyon funt sterlinq) ödəmişdi və onun üzərindən ciddi gəlir əldə etməyə ümid edirdi. Amma məşhur insayder Fabrizio Romanonun məlumatına görə, Xavi Simons indi 70 milyon avrodan (təxminən 59 milyon funt) aşağı qiymətə əldə oluna bilər.

Hər halda, “Bild”in xəbərinə görə, Simons özü də inkişafını davam etdirmək üçün Premyer Liqaya keçməyə daha çox meyllidir. 22 yaşlı futbolçu indiyə qədər PSJ (iki fərqli dövrdə), PSV və “Leypsiq”də çıxış edib.

Qeyd: “Arsenal” bu yay yalnız bir hücumçu – “Çelsi”dən transfer etdiyi Noni Maduekeyi heyətinə qatıb. Viktor Gyökereslə bağlı danışıqlar davam edir, Ebereçi Eze ilə bağlı isə hələlik ciddi irəliləyiş yoxdur. “Real Madrid”in futbolçusu Rodriqo da hədəfdədir, amma onun yüksək maaş tələbləri transferə əngəl ola bilər.

“Çelsi” isə artıq iki hücumçu – Joao Pedro və Liam Delapu transfer edib, lakin hücum xəttini daha da gücləndirmək niyyətindədir.

Qeyd: Xavi Simons “Leypsiq”də keçirdiyi 76 rəsmi oyunda 21 qol vurub, 23 məhsuldar ötürmə ilə yadda qalıb.