“Yuventus” üçün mövsümün taleyini müəyyənləşdirəcək həftə ərəfəsində xoşagəlməz xəbər gəlib. İtaliya nəhəngində əsas heyətin üzvlərindən olan Kefren Türam zədələnib.
90plus.az xəbər verir ki, ulduz futbolçunun “İnter” və “Qalatasaray”a qarşı oyunlarda iştirak edib-etməyəcəyi sual altındadır.
“Yuventus” həm A Seriyasında, həm də Çempionlar Liqasında həlledici mərhələyə qədəm qoyur. Turin təmsilçisi əvvəlcə çempionatda 12 xal fərqi ilə lider olan "İnter"in qonağı olacaq, daha sonra isə Çempionlar Liqası çərçivəsində “Qalatasaray”la qarşılaşmaq üçün İstanbula yollanacaq.
Komandanın əsas orta sahə oyunçularından biri olan Kefren Türamdan isə pis xəbər gəlib. Calcio Mercato nəşrinin yaydığı məlumata görə, fransalı futbolçu bu gün keçirilən məşq zamanı zədələnib.
24 yaşlı yarımmüdafiəçidə sümük ödemi aşkarlanıb. Türamın “İnter”lə oyunda iştirakının gözlənilmədiyi bildirilir. Futbolçunun son vəziyyətinə isə sabah yekun qərar veriləcək.
Qeyd: “Yuventus” üçün qarşıdakı iki görüş mövsümün taleyi baxımından xüsusi əhəmiyyət daşıyır.
