Zinəddin Zidan: “Bir gün Fransa millisinin baş məşqçisi olmaq istəyirəm” 🇫🇷🚨

90plus.az xəbər verir ki, Zinəddin Zidan dörd illik fasilədən sonra yenidən məşqçiliyə qayıtmaq niyyətindədir.

Fransalı mütəxəssis “Festival Dello Sport” tədbirində çıxışı zamanı gələcək planlarından danışıb:

“Əlbəttə ki, baş məşqçi kimi yenidən işə qayıdacağam, bu, mənim planımdır.

Bir gün Fransa yığmasının baş məşqçisi olmaq istəyirəm… Görək necə olur.”

Zidan 2021-ci ilin yayında “Real Madrid”dən ayrıldıqdan sonra peşəkar futboldan uzaq qalıb. Onun rəhbərliyi altında “kral klubu” 2016–2018-ci illər arasında ardıcıl üç dəfə Çempionlar Liqasının qalibi olub. Həmçinin Zidanın komandası iki dəfə La Liqa, iki dəfə UEFA Superkuboku və iki dəfə Klubların Dünya Çempionu titulunu qazanıb.

Fransa millisində Didye Deşam 2026-cı il dünya çempionatından sonra postunu tərk edəcək və Zidan bu vəzifə üçün əsas namizədlərdən biri hesab olunur.

Son illərdə Zidan “Bayern Münhen” və ABŞ yığmasından təkliflər alsa da, bu variantları qəbul etməyib. O, gələcəkdə “Yuventus”a qayıdış ehtimalını da tam istisna etməyib:

“Bilmirəm, gələcəkdə nə baş verəcək. Amma bir gün milli komandaya rəhbərlik etmək istəyirəm. Bu, indilik deyil, amma gələcəkdə niyə də olmasın?”