“Zirə”dən tarixi satış – Salifu Suma “Malmö”də!
90plus.az xəbər verir ki, Azərbaycan Premyer Liqasında çıxışı ilə diqqət çəkən Salifu Suma karyerasını İsveçdə davam etdirəcək. “Zirə” klubu 21 yaşlı qvineyalı hücumçunun “Malmö”yə transfer olunduğunu bu gün rəsmi şəkildə açıqlayıb.
Transferin maliyyə detalları rəsmən açıqlanmasa da, İsveç mətbuatında yayılan məlumatlara əsasən, sövdələşmənin ümumi dəyəri bonuslarla birlikdə 1.3 milyon avro civarındadır. “Zirə”nin bu keçiddən minimum 1.2 milyon avro gəlir əldə etdiyi bildirilib — bu da klub tarixinin ən bahalı satışlarından biri sayılır.
“Malmö” ilə 4.5 illik müqavilə imzalayan Salifu Suma, Skandinaviya nəhənginin heyətində özünü sübut etməyə hazırdır. Klubun rəsmi saytına açıqlama verən Suma, transferin onun üçün böyük fürsət olduğunu bildirib:
“Malmö” kimi köklü bir kluba keçmək karyeramda yeni səhifədir. Burada olmaq mənim üçün qürurvericidir. Komandaya tez uyğunlaşıb uğurlar qazanmaq istəyirəm.”
İsveç təmsilçisinin idman direktoru köməkçisi Ola Toivonen isə gənc futbolçunun sürət və texnikasını xüsusi vurğulayıb:
“Salifunu uzun müddətdir izləyirdik. Sürəti və birə-bir epizodlardakı bacarığı ilə seçilir. Həm potensialı var, həm də hazırkı gücü ilə komandaya fayda verə bilər.”
Qeyd: 115 illik tarixə malik “Malmö” 24 dəfə İsveç çempionu olub və Avropa arenasında da kifayət qədər təcrübəyə sahibdir. Klubun Sumaya etimadı və uzunmüddətli planları onun üçün böyük fürsətlər yarada bilər.
Bu transferlə “Zirə” həm maliyyə baxımından ciddi qazanc əldə etdi, həm də Azərbaycan futbolunun Avropaya futbolçu ixracı baxımından növbəti uğurunu yazdı.
