Ruben Amorim: “Komandamızda axıcılıq və yaradıcılıq çatmadı”.
90plus.az xəbər verir ki, “Mançester Yunayted”in baş məşqçisi Ruben Amorim Premyer Liqanın 2024/25 mövsümündə “Vulverhempton”la Old Trafford-da 1:1 hesablı heç-heçədən sonra oyunu və verdiyi qərarları şərh edib.
Portuqaliyalı mütəxəssis heyətdə dəyişikliklərin və gənc futbolçuların oyuna təsirindən danışıb:
“Fərqli mövqelərdə yeni oyunçular olanda və gənci meydana buraxanda onun çətinlik çəkməsi normaldır. Sabit bir baza olanda oyun daha axıcı olur və gənclərə dəqiqələr vermək daha asandır”.
Amorim yarımmüdafiə seçiminə də toxunub:
“Kasemiro və Uqarte ilə oynayanda bunun Kobi Mainu, Meyson Maunt və ya Bruno Fernandeşdən fərqli olduğunu bilirsən. Bu, tamamilə normaldır”.
Baş məşqçi Coşua Zirkzeenin fasilədə əvəzlənməsini də izah edib. Qolu vuran hücumçunun çıxarılmasının səbəbi taktiki idi:
“Topa nəzarət etməkdə çətinlik çəkirdik, rəqibin yarımmüdafiəsi bizi sıxırdı. Bəzən daha az hücumçu ilə hücum etmək daha effektiv olur. Üç hücumçu ilə oynadıq və bu, hər zaman ən yaxşı seçim deyil”.
Amorim oyunun ümumi gedişindən narazı qaldığını gizlətməyib:
“Bütün oyun ərzində çətinlik çəkdik. Yaradıcılıq az idi, hücumda əlaqələr çatmırdı. Şanslarımız oldu, amma axıcılıq yox idi. Topla yaxşı oynamayanda topsuz da əziyyət çəkirsən”.
Mütəxəssis nəticəyə baxmayaraq irəli baxmağın vacibliyini vurğulayıb:
“Nəticəni dəyişmək mümkün deyil, amma növbəti oyuna hazırlaşa bilərik. Yaxşı oynayanda da, çətinlik çəkəndə də dərs çıxarmaq lazımdır”.
Komandanın gələcəyi ilə bağlı Amorim nikbin danışıb:
“Əminəm ki, güclü komanda olacağıq. Sadəcə bütün oyunçuların geri qayıtmasına ehtiyacımız var. Heç kəsi bir ay kənarda qalmaq riski ilə meydana buraxmayacağam”.
Bu heç-heçə “Mançester Yunayted”i turnir cədvəlində 6-cı pillədə saxlayıb. Komanda Çempionlar Liqasına vəsiqə uğrunda mübarizədə yenidən ritm tapmağa çalışacaq.
