"Real Madrid"in baş məşqçisi Karlo Ançelotti Çempionlar Liqasının pley-off mərhələsində "Mançester Siti" ilə keçiriləcək oyunla bağlı fikirlərini bölüşüb.
90plus.az xəbər verir ki, Ançelotti matç öncəsi hazırlıq prosesini çətin və stresli adlandırıb.
"Bu oyun mənə müasir klassika kimi gəlir, çünki biz illərdir bu turnirdə bir-birimizə qarşı oynayırıq. Matç əvvəlkilər kimi maraqlı olacaq. Nə olacağını təxmin etmək çox çətindir, çünki hər şey komanda keyfiyyətlərindən və fərdi bacarıqlardan asılıdır. Bu, yüksək səviyyəli oyun olacaq və burada ən yaxşı olduğunuzu sübut etməlisiniz.
'Mançester Siti' ilə oynamaq həmişə çətinlik yaradır. Amma reallıq budur ki, bu komanda bizi məğlub edəndə Çempionlar Liqasını qazandı. Əminəm ki, ən yaxşı komanda növbəti mərhələyə yüksələcək. Təəccüblüdür ki, bu oyun pley-off mərhələsində keçiriləcək. Bu vəziyyətə UEFA deyil, biz səbəb olmuşuq, çünki bu qarşılaşma finalda və ya yarımfinalda da baş tuta bilərdi. Lakin yenə də deyirəm, bu, tamamilə bizim günahımızdır."
Məşqçilik karyerası ərzində Pep Qvardiolanın komandalarına qarşı 12 oyun keçirən və onların dördündə qalib gələn Ançelotti iki komanda arasındakı rəqabəti Avropanın ən böyük futbol duellərindən biri kimi qiymətləndirib:
"Hər dəfə 'Siti' ilə qarşılaşanda oyunlara hazırlaşmaq adətən kabusa çevrilir, çünki daim sizi düşündürən suallar və taktikalar ortaya çıxır."
Qeyd: "Real Madrid" "Mançester Siti"yə qarşı səfər oyununu fevralın 11-dən 12-nə keçən gecə, Bakı vaxtı ilə saat 00:00-da keçirəcək.
Pep Guardiola və Karlo Ançelottinin Çempionlar Liqasındakı statistikası:
QVARDİOLA (İspaniya):
171 oyun
109 qalibiyyət
27 məğlubiyyət
35 bərabərlik
3 ədəd UEFA Çempionlar Liqası kuboku
ANÇELOTTİ (İtaliya):
204 oyun
118 qələbə
42 məğlubiyyət
44 bərabərlik
5 ədəd UEFA Çempionlar Liqası kuboku
