“Çelsi”dən təcili qərar: Aaron Anselmino geri çağırıldı, transfer planları sürətlənir.
90plus.az xəbər verir ki, “Çelsi” rəhbərliyi heyətlə bağlı vacib addım atıb. London klubu Aaron Anselminonun müqaviləsində yer alan geri çağırma bəndini aktivləşdirib və futbolçu gələn həftə yenidən “Çelsi”yə qoşulacaq.
Bu barədə “Borussiya Dortmund” rəsmi şəkildə bu gün məlumatlandırılıb. “Çelsi” Anselminonu Almaniyada göstərdiyi təsirli performansdan sonra əsas komandanın bir hissəsi kimi görmək istəyib və müqavilə şərtlərindən istifadə edərək prosesi dərhal yekunlaşdırıb. Məlumat ilk olaraq Devid Ornştayn tərəfindən yayılıb.
Lakin London klubunun planları bununla bitmir. “Çelsi”nin qarşıdakı günlərdə transfer bazarında daha aktiv olacağı bildirilir. Klub hazırda Jeremi Jaken üçün ciddi yarışın içindədir. Gənc futbolçunun indi transfer olunması, lakin yayda komandaya qoşulması planlaşdırılır.
Bu keçid uğrunda “Çelsi”nin əsas rəqibləri “Liverpul” və "Bayern Münhen”dir. Danışıqlar davam edir və mübarizə kifayət qədər gərgindir. Bundan əlavə, növbəti həftə ərzində “zadəganlar”ın heyətlə bağlı əlavə addımlar atması da istisna olunmur.
Bir sözlə, “Stemford Bric”də sakitlik yoxdur: Anselmino artıq geri qayıdır, transfer pəncərəsində isə yeni gedişlər yoldadır.
