“Mançester Yunayted”də müvəqqəti baş məşqçi təyinatı: Darren Fletçer Ser Aleks Ferqyusondan xeyir-dua alıb.
90plus.az xəbər verir ki, “Mançester Yunayted”in sabiq futbolçusu Darren Fletçer “Old Trafford”da müvəqqəti baş məşqçi vəzifəsini qəbul etməzdən əvvəl klubun əfsanəvi çalışdırıcısı Ser Aleks Ferqyusonla məsləhətləşdiyini açıqlayıb.
BBC Sport-a danışan 41 yaşlı mütəxəssis bildirib ki, vacib qərarlar verməzdən öncə Ferqyusonun fikrini almağı özünə borc bilir:
“Ser Alekslə çox yaxşı münasibətim var. Böyük qərarları onunla danışmadan verməyi sevmirəm. Açığı, ondan xeyir-dua almaq istədim. O, bu hörmətə layiqdir.”
Fletçer Ruben Amorimin istefasından sonra komandanın sükanı arxasına keçib. Amorimin son oyunu Premyer Liqada “Lids”lə 1:1 hesablı heç-heçə olub. Həmin qarşılaşmadan sonra baş tutan mətbuat konfransı portuqaliyalı mütəxəssisin gedişini sürətləndirib.
Qeyd: Ferqyuson da həmin oyunu tribunadan izləyib.
Fletçer yaxın günlərdə Premyer Liqada “Börnli” ilə səfər matçında komandanı idarə edəcək. Onun, həmçinin İngiltərə Kubokunun üçüncü mərhələsində “Brayton”a qarşı oyunda da texniki zonada olacağı gözlənilir.
Amorimin tənqid etdiyi məqamlardan biri klub rəhbərliyinin sabiq futbolçu-ekspertlərin, xüsusilə Qari Nevillin fikirlərinə həddindən artıq diqqət yetirməsi idi. Fletçer isə bu yanaşmanı normal sayır:
“Onlar ehtiraslıdır, fikirlərini bildirməyə haqları var. Onların qazandıqları kuboklar var və bu, ‘Mançester Yunayted’ futbolçusu olmağın bir hissəsidir. Buna uyğunlaşmalı və çağırışı qəbul etməlisən.”
Müvəqqəti baş məşqçi vaxt azlığı səbəbindən futbolçularla fərdi söhbətlərə hələ imkan tapmadığını, əsasən kapitan Bruno Fernandeş və təcrübəli oyunçularla ünsiyyətdə olduğunu deyib. O, son günlər Mateuş Kunya və Benjamin Şeşko ilə görüşüb, qapıçı Senne Lammenslə isə ötən həftə danışıb.
Fletçer həmçinin Ruben Amorimlə əlaqə saxlamağa çalışdığını, lakin hələlik mümkün olmadığını bildirib:
“Onunla yaxşı münasibətimiz var idi. Amma futbolda tez irəli baxmaq lazımdır. İndi əsas məqsəd komandaya enerji və ruh qaytarmaqdır.”
