Xabi Alonso “Real Madrid”də intizamı bərpa edir: “Adların mənim üçün fərqi yoxdur”.
90plus.az xəbər verir ki, “Real Madrid”də baş məşqçi postuna təyin olunan Xabi Alonso komandanın qarşısında ilk gündən sərt qaydalar qoymağa başlayıb. İspaniyalı çalışdırıcı futbolçulardan maksimum fədakarlıq tələb edir və məşqlərdəki yanaşmanın oyunlara da eyni şəkildə ötürülməsini istəyir.
“Cadena SER” radiosunun yaydığı məlumata görə, Alonso futbolçularla görüşündə açıq şəkildə bəyan edib ki, “qaçmayan və bütün gücünü ortaya qoymayan futbolçular” heyətdə yer almayacaqlar. O, bu tələblərin bütün oyunçulara — istər əsas heyət üzvlərinə, istərsə də yeni gənclərə — eyni şəkildə şamil olunduğunu bildirib:
“Adların mənim üçün fərqi yoxdur. Kim məşqdə və oyunda maksimum gücünü sərf etmirsə, oynamayacaq.”
43 yaşlı çalışdırıcı həmçinin oyunçuların passiv futbol üslubundan uzaq durmasını tələb edib:
“Sadəcə dayanıb qol vurmaq üçün topun sizə ötürüləcəyini gözləməməlisiniz. Hər dəfə topun arxasınca qaçmalısınız.”
Xabi Alonsonun bu açıqlamaları yeni mövsümdə “Real Madrid”də daha fədakar və dinamik bir oyun tərzinin qurulacağından xəbər verir. Komandanın heyətində ulduz futbolçuların bolluğuna baxmayaraq, Alonso ilk gündən performansa əsaslanan seçimlər aparacağının mesajını verir.
Yeni baş məşqçinin bu sərt yanaşmasının “Real Madrid”in oyun üslubuna necə təsir edəcəyi və futbolçuların bu tələblərə necə uyğunlaşacağı qarşıdakı həftələrdə aydın olacaq.
