“Real Madrid”də süni intellekt də dövriyyədə – Xabi Alonsonun istəyi ilə “ThermoHuman” dövrü başlayır.
90plus.az xəbər verir ki, “Real Madrid”in yeni baş məşqçisi Xabi Alonso komandasının məşqçilər heyətini gücləndirməkdə davam edir. Onun xüsusi istəyi ilə fiziki hazırlıq sahəsində iki tanınmış mütəxəssis – Xavyer Arnaiz və İsmael Fernandes heyətə daxil edilib.
Bu şəxsləri digərlərindən fərqləndirən əsas məqam isə onların təkcə fiziki məşqçi yox, eyni zamanda “ThermoHuman” adlı innovativ texnologiyanın əsas qurucularından olmalarıdır.
“ThermoHuman” nədir?
Bu sistem süni intellekt və termal (istilik) kameraların vəhdətində işləyən, insan bədəninin fiziki vəziyyətini real vaxtda analiz edən texnologiyadır.
İdmançının bədənindəki istilik bölgüləri, əzələ yüklənmələri və mümkün zədələnmə riskləri bu texnologiya vasitəsilə əvvəlcədən aşkarlanır. Sistem, termal görüntüləri AI vasitəsilə təhlil edərək məşq proqramlarını fərdi şəkildə tənzimləmə imkanı yaradır.
Zədələrin qarşısını almaq və performansı artırmaq
“Real Madrid” kimi yüksək səviyyəli klublarda ən kiçik fərqlər belə nəticəyə ciddi təsir göstərə bilir. “ThermoHuman” isə məhz bu detalları vaxtında analiz edərək riskləri minimuma endirmək üçün nəzərdə tutulub.
Xavi Alonso bu texnologiyanın “Real Madrid"də tətbiqi ilə komandasının zədə faizini azaltmağı və oyunçuların mövsüm boyunca fiziki durumunu optimal səviyyədə saxlamağı hədəfləyir.
Qeyd: “ThermoHuman” sistemi hazırda bəzi Avropa klublarında, o cümlədən olimpiya komandalarında da istifadə olunur və bir çox zədənin qarşısını almaqda müsbət nəticələr göstərib.
Yeni texnologiyanın “Real Madrid”də hansı effekti verəcəyini isə qarşıdakı mövsümdə izləmək mümkün olacaq.
