“AS” nəşrinin məlumatına görə, “Barselona” bu ay La Liqa və İspaniya Kubokunu qazandığı üçün təxminən 28 milyon avro həcmində bonus paylayacaq.
90plus.az xəbər verir ki, bu addım klubun maliyyə vəziyyətinin yaxşılaşdığına dair prezident Joan Laportanın inamını bir daha təsdiqləyir. La Liqanın təzyiqlərinə və Maliyyə Fair Play qaydaları ilə bağlı davam edən nəzarətə baxmayaraq, Laporta bildirib ki, klubun maliyyə durumu tədricən sabitləşir.
Bonus fondunun ən böyük hissəsi əsas komandaya çatacaq. “AS” yazır ki, futbolçular ölkə daxilində “dubl”a görə orta hesabla 1,25 milyon avro qazanacaqlar. Bu, ümumilikdə komandaya təxminən 25 milyon avro bonus deməkdir. Bonus sistemi İspaniya Kubokunu ayrıca deyil, La Liqa ilə birlikdə böyük uğur kimi qiymətləndirərək nəzərə alır.
Hansi Flikin başçılıq etdiyi məşqçi heyətinə də bonus veriləcək. Hər bir üzvə La Liqa və kubok zəfərlərinə görə 20 min avro, bundan əlavə, yanvarda qazanılan İspaniya Superkubokuna görə daha əvvəl ödənilmiş 10 min avro ilə birlikdə ümumilikdə 30 min avro ödənəcək.
Klub əməkdaşları da unudulmayıb. Mövsüm sonu münasibətilə “Vellissima” restoranında keçirilən şam yeməyində Laporta işçiləri ikiqat əmək haqqı ilə yanaşı, əlavə xüsusi bonusla da təəccübləndirib. Bu kateqoriyaya təxminən 2 milyon avro ayrılacaq.
Laportanın bu açıqlaması tədbirdə coşqu ilə qarşılanıb və gecəboyu Barselonanın əyləncə məkanlarında qeyd etmələr davam edib. Prezident həmçinin işçilərə zəhmətləri üçün təşəkkür edib və “Barselona”nı dünyanın ən güclü çoxnövçülü idman klubu etmək üçün birlikdə çalışmağa çağırıb.
Ümumilikdə 28 milyon avroluq bonus paketi klubun yeni qapıçısı Xoan Qarsiyanın sərbəstqalma məbləğinə (təxminən eyni məbləğdə) uyğun gəlir. Bundan əlavə, “Atletik”dən Niko Uilyamsın 62 milyon avroluq transfer maddəsi hələ də gündəmdədir və bu da göstərir ki, “Barselona”nın yay xərcləri hələ başa çatmayıb.
