NBA-də “Los Anceles Klippers”in formasını geyinən Ceyms Harden “Şarlott Hornets”ə qarşı keçirilən oyunda tarixi göstəriciyə imza atıb.

90plus.az xəbər verir ki, Klippers rəqibini 117:109 hesabı ilə məğlub etdiyi görüşdə Hardenin 32 xalı onu NBA tarixinin ən çox xal toplayan oyunçuları siyahısında 9-cu pilləyə yüksəldib.

“İntuit Doum” arenasında baş tutan qarşılaşmada “Los Anceles Klippers” Kavai Leonardın 35 xal, 5 ribaund, Ceyms Hardenin isə 32 xal, 4 ribaund, 10 asist və 4 top oğurluğu ilə yadda qalan performansı sayəsində ardıcıl üçüncü, mövsümdə isə 16-cı qələbəsini qazanıb.

Karyerası ərzində 28 614 xal toplayan Harden bu göstərici ilə Şakil O’Nilin (28 596) rekordunu geridə qoyaraq NBA-nin müntəzəm mövsümləri tarixində ən çox xal yığan oyunçular arasında 9-cu yerə yüksəlib.

“Şarlott Hornets”in heyətində LaMelo Boll 25, Kon Knüppel isə 18 xal toplasa da, bu göstəricilər komandanın mövsümdə 26-cı məğlubiyyətinin qarşısını ala bilməyib.

“Sakramento Kinqs” Doncicin 42 xalına baxmayaraq qalib gəldi

Günün digər oyununda “Sakramento Kinqs” öz meydanında “Los Anceles Leykers”i 124:112 hesabı ilə məğlub edib.

Mövsümdə 10-cu qələbəsini qazanan “Sakramento Kinqs”də DeMar DeRozan 32, Malik Monk 26, Rassel Vestbruk isə 22 xal toplayıb.

Ardıcıl üçüncü olmaqla ümumilikdə 14-cü məğlubiyyətini yaşayan “Los Anceles Leykers”də Luka Donçiç 42 xal, 7 ribaund və 8 asistlə oyunun ən məhsuldar basketbolçusu olub. LeBron Ceyms isə 22 xal və 4 ribaundla yadda qalıb.