“Barselona”nın idman direktoru Deko yay transfer planları çərçivəsində “Atletik”in cinah oyunçusu Niko Uilyamsı transfer hədəfi kimi təsdiqləyib.

 90plus.az xəbər verir ki, o, bu barədə La Vanguardia nəşrinə danışıb və yeni cinah oyunçusunun niyə prioritet olduğunu, Nikonun bu plandakı yerini izah edib.

“Cinah oyunçularımız sadəcə Lamin və Rafinyadır,” – deyə Deko bildirib.

“Ferran Torres artıq daha çox hücumçu kimi çıxış edir. Lamin və ya Rafinya oynamadıqda komandanın səviyyəsi aşağı düşür. Buna görə də keyfiyyət və qiymət baxımından uyğun variantlara baxırıq.”

Deko əlavə edib ki, klub artıq Niko Uilyamsən agenti ilə əlaqə yaradıb:

“Sonda bir proses var: əvvəlcə agentlə danışırsan, sonra müqaviləyə baxırsan və klubun buraxılış maddəsinin ödənilməsini istəyib-istəmədiyini və ya danışıqlara açıq olub-olmadığını öyrənirsən. Nikonun vəziyyətində buraxılış maddəsi aydındır.”

Niko ilə Lamin Yamal arasındakı dostluq barədə sualı cavablandıran Deko qəti şəkildə belə deyib:

“Bəli, onlar dostdurlar, amma bu, dostluq klubu deyil. Bu, iş və qələbə yeridir. Əgər komandaya qoşularsa, əla, yaxşı anlaşacaqlar. Amma ilk növbədə klubun dəyərlərinə və gözləntilərinə uyğun olmalıdır.”

“Bəli, Niko Uilyams gəlmək istəyir… və biz çalışacağıq,” – deyə Deko açıqlamasında bildirib.

O, əlavə edib ki, 22 yaşlı futbolçu təkcə özü deyil, bir çox digər oyunçular da “Barselona”ya keçmək arzusundadır:

“Niko da digər futbolçular kimi buraya gəlmək üçün güclü istək göstərir.”