Fransa millisinin üzvü İbrahima Konate DÇ-2026-nın seçmə mərhələsinin 6-cı turunda Azərbaycanla keçiriləcək qarşılaşmadan əvvəl təşkil olunan mətbuat konfransında jurnalistlərin suallarını cavablandırıb.

90plus.az "Liverpul" klubunun müdafiəçisinin fikirlərini təqdim edir:

Sabahkı oyunda kapitan olma ehtimalı haqqında:

• Kapitan olub-olmayacağımı bilmirəm, bunu ancaq baş məşqçi müəyyən edə bilər. Oyun çətin keçə bilər, amma əsas məsələ matçdan həzz almaqdır. Buraya Fransa adından çıxış etməyə gəlmişik. Məqsədimiz isə oyundan xal qazanmaqdır.

Qapıçının kimliyi...

• Bu qərar mənlik deyil, baş məşqçiyə aiddir. O, yaxşı səviyyəli qapıçıdır. Ümid edirəm ki, sabah ilk dəfə əsas heyətdə yer alacaq və Fransa yığmasını layiqincə təmsil edəcək.

Parisdəki oyunda Azərbaycan sizə çətin anlar yaşatmışdı...

• Bəli, Parisdə keçirilən matçda Azərbaycan millisi bizi müsbət mənada təəccübləndirmişdi. Artıq nəticədən asılı olmayaraq oyunumuzu göstərməliyik. Sabah hesab istənilən kimi ola bilər, amma siz də nəticədən çox oyunun özünə diqqət etməlisiniz. Bizim Fransa xalqı qarşısında məsuliyyətimiz böyükdür.