İslamiada: Azərbaycan güləşindən növbəti qızıl xəbər var!

90plus.az xəbər verir ki, Səudiyyə Ərəbistanının paytaxtı Ər-Riyadda təşkil olunan VI İslam Həmrəyliyi Oyunlarında qadın güləşçimiz Jalə Əliyeva (57 kq) möhtəşəm çıxışla yarışın qalibi olub. Final qarşılaşmasında Türkiyə idmançısı Elvira Süleyman üzərində 6:2 hesablı qələbə qazanan Jalə fəxri kürsünün ən yüksək pilləsinə yüksəlib.

Jalənin ürək sözləri: "Finalda qalib gəlmək çox sevindiricidir. Yarışa çox ciddi hazırlaşmışdım. Mənə dəstək olan azarkeşlərə, Azərbaycan xalqına dərin təşəkkürümü bildirirəm. Çempionluğumda əməyi olan məşqçilərimə də minnətdarlığımı çatdırıram.

Bu il 2 dəfə ağır zədə almışıdm. Ona görə tam istədiyim kimi çıxış edə bilmirdim. Bununla belə, sonda qalib gələn tərəf oldum. Final görüşüm çox çətin keçdi".

Günün digər görüşlərində də millimiz medalsız qalmayıb. Yunan-Roma güləşçisi Murad Əhmədiyev (97 kq) gümüş, qadın güləşçimiz Elnurə Məmmədova (50 kq) isə bürünc medal əldə edərək yarışda uğurlu çıxışımıza töhfə veriblər.