"Benfika"nın baş məşqçisi Joze Mourinyo “Beşiktaş”lı Rafa Silva barədə: “Danışa bilərəm, amma istəmirəm”.
90plus.az xəbər verir ki, Portuqaliya Liqasında 25 xalla 3-cü pillədə qərarlaşan “Benfika”nın baş məşqçisi Joze Mourinyo Portuqaliya Kubokunun 4-cü turunda “Atletiko CP” ilə qarşılaşacaqları oyun öncəsi jurnalistlərin suallarını cavablandırıb. Təcrübəli mütəxəssis Rafa Silva ilə bağlı da danışıb. Mətbuat konfransında Joze Mourinyoya “Beşiktaş”dan ayrılmaq istəyən Rafa Silva haqqında sual ünvanlanıb.
Portuqaliyalı baş məşqçi Rafa Silva barədə konkret fikir bildirməkdən çəkinirmiş kimi görünsə də, onun guya xarakterinə görə komandasında istəmədiyinə dair yayılan xəbərləri yalanlayıb. Mourinyo hazırda başqa bir klubun futbolçusu olan Rafa haqqında danışmaq istəmədiyini vurğulayıb. Onun sözləri belədir:
“Başqa klubların oyunçuları barədə danışa bilmərəm. Danışa bilərəm, amma danışmaq istəmirəm. Heç bir şərh verməyəcəyəm. Bəzi həmkarlarınız artıq bir tablo yaradıb, hətta onun guya xarakterini bəyənmədiyimi də yazıblar. Mən kiməm ki, heç tanımadığım birinin xarakterini bəyənmədiyimi deyim? Üstəlik, tanımadığım biri haqqında niyə belə bir söz deyim?”
ℹ️ Həftə ərzində məşqlərə çıxmaqdan imtina edən Rafa Silva belində ağrı olduğunu bildirmişdi. “Beşiktaş”ın açıqladığı tibbi arayışda Rafanın ağrısına səbəb ola biləcək heç bir ciddi problemin aşkarlanmadığı barədə məlumat yayıldıqdan sonra portuqaliyalı futbolçu ilə “Qara Qartal” arasında gərginlik daha da artıb. Portuqaliya mətbuatı və “Benfika” isə Rafanın durumunu yaxından izləməyə davam edir.
