“Barselona”nın Niko Uilyamsı transfer etmə cəhdləri dayanıb. Halbuki əvvəlki xəbərlərdə oyunçu ilə 6 illik razılaşmanın əldə edildiyi bildirilirdi.

 90plus.az xəbər verir ki, bu transfer hazırda maliyyə məhdudiyyətləri və La Liqanın qeydiyyat qaydalarına görə təxirə salınıb.

“Barselona”nın əsas problemi “Atletik” klubunun tam buraxılış məbləğini – 58 milyon avro və üstəlik vergi ödənişlərini birbaşa ödəməyi tələb etməsidir. “Atletik” bu məsələdə heç bir güzəştə getmir və ödəmə strukturuna dair danışıqlardan imtina edir.

Kataloniya klubu isə hazırda maaş büdcəsini La Liqanın “1:1 xərcləmə qaydasına” uyğunlaşdırmağa çalışır. Lakin La Liqa onların qeydiyyat planını təsdiqləməyincə, transfer prosesi dayandırılıb (📰: AS).

“Atletik” klubu Nikonun gələcəyi ilə bağlı yayılan söz-söhbətlər fonunda Barakaldo şəhərində onun təsvir olunduğu muralın vandallığa məruz qalmasını kəskin şəkildə pisləyib. Klub bu hadisəyə cavab olaraq birlik, ləyaqət və hörmətə çağırış edən güclü bəyanat yayıb.

Söhbət yerli rəssam Karlos Lopez tərəfindən Lutxana məhəlləsində çəkilmiş və Uilyams qardaşlarını — Niko və İnakini təsvir edən muraldan gedir. Sakinlər üçün rəmzi bir dəyər daşıyan bu divar rəsmi son günlərdə təhqir olunub: Nikonun şəkli silinib və yerinə “Get ya da qal, hörməti itirdin” yazısı əlavə olunub. Bu, görünür ki, onun klubdan ayrılacağına dair şayiələrə reaksiya olub.

Bununla bağlı açıqlama yayan “Atletik” rəhbərliyi bu vandal hərəkəti yalnız oyunçuya deyil, bütün klubun dəyərlərinə hörmətsizlik kimi qiymətləndirib:

“Nikonun şəklini silənlər “Atletik”i təmsil etmir. Əgər kimsə bu ailənin üzvü olduğunu düşünürsə, yanılır: bizim oyunçumuza hörmətsizlik, “Atletik”ə hörmətsizlikdir.”

Bəyanatda qeyd olunub ki, “ləyaqət” klubun əsas prinsiplərindən biridir və bu dəyər hörmət, dəyərlərə sadiqlik və təmkinlə davranışla ifadə olunur.

“‘Atletik’i müdafiə etmək, təhqirə yol verməmək və provakasiyalara uymamaq deməkdir.”

Klub tərəfdarların Niko Uilyams ətrafında gedən söz-söhbətlərdən narahat olduğunu anlayışla qarşılayır, lakin onlara sakit və təmkinli olmağa, klubun satılmayan və satın alınmayan kimliyinə sadiq qalmağa çağırır.

“Atletik” həmçinin rəssam Carlos Lopezlə artıq əlaqə saxladıqlarını və muralın bərpası üçün tam dəstək verəcəklərini açıqlayıb.

Bəyanatın sonunda isə klubun gələcəyə inamla baxdığı və birliyini qoruduğu vurğulanıb:

“‘Atletik’ sadəcə fərdlərdən ibarət deyil. Bu bir ailədir, bir icmadır. Hər zaman başıuca, hörmət və qürurla yoluna davam edəcək — həm burda olanlarla, həm də gələcəkdə gələcək olanlarla.”

Qeyd: Niko Uilyams həm “Atletik”, həm də İspaniya yığması üçün əsas fiqurlardan biridir. O, 2027-ci ilə qədər klubla müqavilə altında qalsa da, “Barselona” da daxil olmaqla bir neçə klubun onunla maraqlandığı xəbərləri yayılmaqda davam edir.