“Real Oviyedo” 24 ildən sonra La Liqaya yüksəlməsi şəhərdə böyük şənliklə qeyd olundu.
90plus.az xəbər verir ki, İspaniyanın köklü klublarından olan “Real Oviyedo”nun 24 illik fasilədən sonra nəhayət ki, La Liqaya yüksəlməsini azarkeşlər böyük coşqu ilə qeyd edir. Uzun illərdir, aşağı liqalarda çıxış edən komanda nəhayət ki, ölkə futbolunun “elita”sına qayıdaraq tarixinin ən önəmli səhifələrindən birini yazdı.
Xüsusilə, azarkeşlərin son həftələrdə komandaya verdiyi böyük dəstək stadionda əsl bayram atmosferi yaradıb. Pley-offun həlledici oyunundan sonra Ovyedo şəhərində küçələrə axışan minlərlə azarkeş klubun La Liqaya dönüşünü möhtəşəm şəkildə qeyd edib. Şəhərdə gecə saatlarına qədər davam edən sevinc yürüşləri, alqışlar və atəşfəşanlıq Asturiyada futbolun necə böyük dəyər daşıdığını bir daha göstərdi.
VİDEO: https://t.me/doxsanplus/104534
24 illik həsrət bitdi
“Real Oviyedo” son dəfə 2000/01 mövsümündə La Liqada çıxış etmişdi. Həmin dövrdən sonra maliyyə və idman problemləri klubun ardıcıl şəkildə aşağı liqalara yuvarlanmasına səbəb olmuşdu. Hətta müəyyən dövrlərdə klubun peşəkar statusunu belə itirmək təhlükəsi yaranmışdı. Lakin həm rəhbərliyin, həm də sadiq azarkeşlərin səyi nəticəsində klub ayaqda qalmağı bacardı və bu gün zirvəyə qayıtdı.
Qeyd: Bu uğur yalnız bir klubun deyil, bütün Asturiyanın futbol mədəniyyətinin dirçəlişinin simvoludur. “Real Oviyedo”nun La Liqaya dönüşü həm İspaniya futboluna rəng qatacaq, həm də aşağı liqadakı digər klublar üçün motivasiya mənbəyinə çevriləcək.
