FIFA: 2026-cı ilin qış transfer dövründə klublar təxminən 2 milyard dollar xərcləyib.
90plus.az xəbər verir ki, Beynəlxalq Futbol Federasiyaları Assosiasiyası (FIFA) 2026-cı ilin qış transfer dövrü ilə bağlı hesabatını açıqlayıb. Hesabata əsasən, dünya üzrə futbol klubları ara transfer pəncərəsində ümumilikdə təxminən 2 milyard dollar məbləğində xərc çəkib.
FIFA-nın məlumatına görə, 2026-cı ilin qış transfer dövründə 5 min 900-dən çox beynəlxalq transfer həyata keçirilib. Bu keçidlər üçün klubların xərclədiyi ümumi məbləğ 1 milyard 900 milyon dolları ötüb.
İngiltərə klubları transfer xərclərinə görə ilk sırada qərarlaşıb. İngilis təmsilçiləri 360 milyon dollardan artıq transfer haqqı ödəyərək İtaliya, Braziliya, Almaniya və Fransa klublarını geridə qoyub.
Satış gəlirlərinə nəzər saldıqda isə Fransa klubları ön plana çıxıb. Fransız klubları futbolçu satışlarından 215 milyon dollar gəlir əldə edib. Bu göstəricidə Fransanı İtaliya, Braziliya, İngiltərə və İspaniya klubları izləyib.
Hesabatda kişi futbolu ilə bağlı maraqlı detal da yer alıb. Belə ki, 2025-ci ilin yanvar ayı ilə müqayisədə kişi futbolunda transfer xərclərində təxminən 18 faiz azalma qeydə alınıb. Qadın futbolunda isə əksinə, yeni rekord müəyyənləşib. İlk dəfə olaraq qış transfer dövründə qadın futbolu üzrə transfer xərcləri 10 milyon dollar həddini keçib.
Bundan əlavə, İngiltərə klubları qadın futbolunda da lider mövqedə yer alıb. İngiltərə təmsilçiləri bu sahədə transferlərə ümumilikdə 5 milyon dollar xərcləyərək ilk sırada qərarlaşıb.
