Raul Asensio üçün 4 il həbs və 58 min avro təzminat tələb olunur.

90plus.az xəbər verir ki, “Real Madrid”in ikinci komandası olan “Kastilya”nın müdafiəçisi Raul Asensio ilə bağlı hüquqi proses davam edir. İtiham tərəfi gənc futbolçu üçün 4 il həbs cəzası, 20 ay müddətində gündə 10 avro cərimə və 58 min avro təzminat tələb edir.

Xatırlatma: 2023-cü ildə “Real Madrid "Kastilya”nın 4 futbolçusu yetkinlik yaşına çatmayan qızın razılığı olmadan onun iştirak etdiyi intim videonu çəkməkdə və yaymaqda ittiham olunmuşdu. Həmin hadisə böyük rezonans doğurmuş və bu ilin mayında adıçəkilən oyunçulara qarşı cinayət işi açılmışdı.

İlkin mərhələdə Raul Asensio da həmin 4 futbolçu arasında idi, lakin yetərli sübutların olmaması səbəbilə onun adı istintaq siyahısından çıxarılmışdı. Buna baxmayaraq, ittiham tərəfi futbolçunun məsuliyyət daşıdığını irəli sürərək onun cəzalandırılmasını tələb edir.

İş üzrə yekun qərarın yaxın həftələrdə verilməsi gözlənilir.

📰: Marca & COPE