OKDiario nəşrinin yaydığı məlumata görə, “Real Madrid” son on gün ərzində Arda Güler üçün daxil olan üç təklifi rədd edib.
90plus.az xəbər verir ki, klub hazırda türkiyəli yarımmüdafiəçinin yeni baş məşqçi Xabi Alonso rəhbərliyi altında necə inkişaf edəcəyini izləməyə üstünlük verir. Gənc futbolçu ilə bağlı təkliflər “Yuventus”, “Bayer Leverkuzen” və “Nyukasl” klublarından gəlib. Onlar ya transfer, ya da icarə əsasında oyunçunu heyətinə qatmaq istəsə də, “Real Madrid” bu müzakirələrə müsbət yanaşmayıb.
Arda Gülerin ilk iki mövsümündə o qədər də çox şans qazanmaması və uzunmüddətli zədələrlə start götürməsi çətinliklər yaratmışdı. Lakin buna baxmayaraq, o, “Real Madrid”in ən perspektivli futbolçularından biri kimi dəyərləndirilir. Xüsusilə, Xabi Alonsonun gəlişindən sonra vəziyyəti nəzərəçarpacaq dərəcədə yaxşılaşıb. Alonso Gülerə onun klubun planlarında olduğunu və qarşıdakı mövsümdə daha çox şans qazanacağını bildirib.
Türkiyəli futbolçu özü də “Real Madrid”dəki gələcəyi və Alonso ilə münasibəti barədə danışıb:
“Xabi Alonso ilə özümü daha vacib hiss edirəm. O, daim mənimlə danışır. Bu, mənim üçün çox önəmlidir”, – deyə Arda bildirib.
“O, tempi idarə etməyi sevir, daha çox qısa ötürmələr istəyir və məni yarımmüdafiəçi kimi görür. Bu, mənim üçün daha uyğun mövqedir”, – o əlavə edib.
Xabi Alonso isə Arda Gülerin komandadakı rolu ilə bağlı bunları deyib:
“Mən istəyirəm ki, Arda topa yaxın oynasın. O, xüsusi bir futbolçudur və komandanın oyununa həmişə təsir edir”.
