"Real Madrid" klubu Çempionlar Liqasının pley-off mərhələsinin ilk oyununda baş verən irqçilik insidenti ilə bağlı UEFA-ya rəsmi şəkildə sübutlar təqdim etdiyini açıqlayıb.
90plus.az xəbər verir ki, hadisə Lissabondakı "Eştadiu da Luj" stadionunda keçirilən "Benfika" – "Real Madrid" qarşılaşması zamanı qeydə alınıb.
Məlumata görə, matç zamanı "Benfika"nın cinah oyunçusu Canluka Prestianni tərəfindən "Real Madrid"in futbolçusu Vinisius Juniora qarşı irqçi ifadə səsləndirilib. Bundan sonra Madrid təmsilçisi məsələ ilə bağlı dərhal hərəkətə keçib.
Klubun rəsmi bəyanatında deyilir:
“"Real Madrid" CF bildirir ki, bu gün ötən çərşənbə axşamı, fevralın 17-də Lissabonda "Benfika"ya qarşı keçirdiyimiz Çempionlar Liqası oyunu zamanı baş verən hadisələrlə bağlı əlimizdə olan bütün sübutları UEFA-ya təqdim etmişik.
Klubumuz həmin qarşılaşmada yaşanan qəbuledilməz irqçilik halları ilə bağlı UEFA tərəfindən açılan araşdırmada fəal əməkdaşlıq edib.
"Real Madrid" futbolçumuz Vinisius Juniorun dünya futbol ictimaiyyətinin bütün təbəqələri tərəfindən aldığı yekdil dəstəyə və həmrəyliyə görə minnətdarlığını bildirir.
Klubumuz idmanda və cəmiyyətdə irqçiliyin, zorakılığın və nifrətin tamamilə aradan qaldırılması üçün bütün qurumlarla əməkdaşlığı davam etdirəcək.”
Qeyd: UEFA artıq insidentlə bağlı araşdırmaya start verib. Gözlənilir ki, məsələ ilə bağlı yaxın günlərdə rəsmi qərar açıqlanacaq.
