“Real Madrid”də Rodriqonun vəziyyəti getdikcə daha çox müzakirə mövzusuna çevrilir. Xabi Alonsonun planlarında braziliyalı futbolçunun yeri ilə bağlı suallar yaranmağa başlayıb.
90plus.az xəbər verir ki, uzun müddətdir formasını tapa bilməyən Rodriqonun heyətdəki mövqeyi getdikcə daha da qeyri-müəyyənləşir.
“El Larguero” proqramında danışan jurnalist Antonio Romero bildirib: “Hazırda Xabi Alonso Rodriqonu hücumda sonuncu seçim kimi görür.” Bu sözlər futbolçunun gələcəyi ilə bağlı yayılan yay transferi şayiələrinin fonunda daha da diqqət çəkir.
Alonsonun ictimaiyyətə dedikləri isə fərqli təəssürat yaradır: “O, bizim üçün hələ də vacibdir və Dünya Çempionatında ona ehtiyacımız olacaq. Rodriqo xüsusi futbolçudur.” Lakin Klubların Dünya Çempionatında göstərdiyi zəif performans onun kəskin tənqid olunmasına səbəb olub.
Məlumatlara görə, Kilian Mbappenin komandaya qayıdışına baxmayaraq, gənc Qonsalo Qarsiya hələ də Rodriqodan üstün hesab olunur. Yayda cəlbedici bir təklif gəldiyi halda, “Real Madrid” Rodriqonu satmağı ciddi şəkildə nəzərdən keçirə bilər.
