U-21 millisi Cəbəllütariqi məğlub etdi – Rəşad Eyyubov qələbəni şərh etdi.
90plus.az xəbər verir ki, Azərbaycan 21 yaşadək futbolçulardan ibarət milli komandası Avropa çempionatının seçmə mərhələsində Cəbəllütariq üzərində 1:0 hesablı qələbə qazandıqdan sonra baş məşqçi Rəşad Eyyubov matçla bağlı fikirlərini AFFA-nın mətbuat xidmətinə açıqlayıb:
“Bu qarşılaşma mənim üçün xüsusilə maraqlı oldu. Əsas məsələ rəqibin 10 nəfərlə müdafiə olunan blokunu necə aşmaq idi.
Birinci hissədə bir neçə qol epizodu yaratdıq, amma istifadə edə bilmədik. İkinci hissədə sistemi dəyişdik və daha çox təzyiq göstərdik.
Ümumilikdə daha çox qol vurmağa layiq idik, amma ən önəmlisi 3 xal qazanmamızdır. Bilirdik ki, oyun çətin olacaq. Eyni problemləri Çexiya və Şotlandiya da yaşamışdı”, – deyə Eyyubov bildirib.
Qələbə qolunun müəllifi Murad Məmmədov barədə də fikirlərini paylaşan baş məşqçi əlavə edib:
“Muradın matçın açar oyunçularından biri olacağını bilirdim. Aşağı bloklara qarşı oyun üçün əla keyfiyyətlərə malikdir. Ümid edirəm ki, bu qol ona daha çox özünəinam verəcək. Bu nəticənin bütün futbolçuların inkişafı üçün müsbət impuls olacağına inanıram.”
Rəşad Eyyubov əsas millinin oyunlarından sonra U-21-in düşərgəsinə qoşulan Rüfət Abbasov haqqında da danışıb:
“Rüfət uzun və çətin səyahətdən sonra xarakter nümayiş etdirdi, 90 dəqiqə yüksək səviyyədə oynadı. Ümumilikdə, komanda daha dominant üslubda çıxış edə bildi. Bir çox futbolçu məni müsbət mənada təəccübləndirdi.”
Baş məşqçi A millinin rəhbəri Ayxan Abbasovun matçı stadiondan izləməsini də qeyd edib:
“Milli komandanın baş məşqçisinin oyunumuzu izləməsi futbolçular üçün əlavə motivasiya oldu. İndi isə görülən işləri təhlil edib gələcəyə nikbin baxırıq".
