“15 yaşımda bura gəlmişdim, indi isə vidalaşmaq vaxtıdır” — Xoan Qarsiya “Espanyol”a vida etdi, “Barselona”ya keçir.

90plus.az xəbər verir ki, “Espanyol” klubunun qapıçısı Xoan Qarsiya komandadan ayrıldığını rəsmən açıqlayıb. 24 yaşlı futbolçu çərşənbə günü səhər şəxsi sosial media hesabında paylaşdığı vida videosunda klubla yollarını ayırdığını bildirib. Onun “Barselona”ya keçidi yaxın günlərdə rəsmi elan olunacaq. Transferin dəyəri 25 milyon avro olaraq göstərilir.

“İndi ayrılıq vaxtıdır,” – deyə Qarsiya bildirib. “Bu gün 15 yaşımda qapısından daxil olduğum, uzun illər evim olan klubla vidalaşıram. Bu müddət ərzində hər gün həm futbolçu, həm də insan kimi böyüməyə çalışdım.”

O, əlavə edib: “Hər zaman bunu təvazökarlıqla, əzmlə və ‘Espanyol’un qapısını qorumaq qüruruyla etmişəm. Unudulmaz anlar yaşadım və yaddaşımda qalacaq xatirələr topladım.”

“Bütün komanda yoldaşlarıma, məşqçilərə, klub işçilərinə və azarkeşlərə təşəkkür edirəm. Bu yolun bir parçası oldunuz. Buradan dolu bir qəlblə ayrılıram,” – deyə Qarsiya sözlərini tamamlayıb.