Niko Uilyamsın “Atletik Bilbao” ilə müqaviləsini 2035-ci ilə qədər uzatması xəbəri futbol dünyasında, xüsusilə də onu səbirsizliklə gözləyən “Barselona” azarkeşləri arasında böyük əks-səda doğurub.

90plus.az xəbər verir ki, 22 yaşlı vingerin “Atletik Bilbao”da qalmaq qərarı sosial şəbəkələrdə geniş qəzəb və istehza ilə qarşılanıb, çoxlu sayda azarkeş məyusluq və narazılıqlarını ifadə edib.

Lamin Yamalın atası Munir Nasrayi də bu xəbərə instaqramda reaksiya verib. O, üzərində “Barselona” loqosu olan ürək şəkli paylaşaraq fon musiqisi kimi Skinny Flex-in “Can’t Trust” (“Etibar edə bilməzsən”) mahnısını seçib. Mahnının sözləri Uilyamsın qərarına işarə kimi qəbul olunub və işlərin planlaşdırıldığı kimi getmədiyi mesajını verir.

Yamal və Niko Uilyams İspaniya millisində yaxın dost və komanda yoldaşıdırlar. Yamal açıq şəkildə Uilyamsı “Barselona”da yanında görmək istədiyini dəfələrlə dilə gətirmişdi ki, bu da müqavilə yenilənməsi xəbərini daha da gözlənilməz edib.

Sosial şəbəkələrdə reaksiyalar güclü olub. “Atletik Bilbao” azarkeşləri Uilyamsın klubda qalmasına sevinərək bunu qeyd edib, “Barselona” fanatları isə məyusluqla bu xəbəri qəbul ediblər.