"Mançester Yunayted"in portuqaliyalı kapitanı Bruno Fernandeş Səudiyyə Ərəbistanı klubundan inanılmaz bir təklif alıb. 30 yaşlı yarımmüdafiəçiyə təklif olunan məvacib futbol ictimaiyyətini heyrətə gətirib.

90plus.az xəbər verir ki, İngiltərə Premyer Liqasını 15-ci pillədə tamamlayan və UEFA Avropa Liqasının finalında məğlub olan "Mançester Yunayted" üçün 2024/25 mövsümü faciəvi olub. Komanda yay transfer pəncərəsinə ciddi hazırlaşır. Əsas müzakirə mövzularından biri isə komandanın kapitanı Bruno Fernandeşin gələcəyidir.

Portuqaliya millisinin üzvü gələcəyi ilə bağlı verdiyi açıqlamada, "Əgər klub bir az pul qazanmaq üçün yollarını ayırmağın vaxtının çatdığını düşünürsə, deməli budur vəziyyət," deyərək ayrılığa açıq qapı qoyub.

İngiltərə mətbuatı, xüsusilə "Daily Mail" yazır ki, Bruno Fernandeşin nümayəndələri ilə Səudiyyə Ərəbistanının "Əl-Hilal" klubu arasında danışıqlar aparılır. İddialara görə, təcrübəli oyunçu vətəndaşı Kriştiano Ronaldonun yolunu izləyə bilər.

Məlumata görə, Bruno Fernandeşə qərar verməsi üçün 72 saat vaxt verilib. Təklifə əsasən, həftəlik 700 min funt (vergidən azad) maaş və əlavə bonuslarla birlikdə 3 il ərzində ümumilikdə 200 milyon funt qazanacaq. "Əl-Hilal" həmçinin "Mançester Yunayted"ə oyunçunun transferi üçün 100 milyon funt (təxminən 135 milyon ABŞ dolları) ödəməyə hazırdır.