Santi Kazorla “Real Oviedo”nu La Liqaya daşıdı – futbol romantikasının zirvəsi!
90plus.az xəbər verir ki, ispan futbolunun sevilən simalarından olan Santi Kazorla əsl futbol sədaqətinin və romantikasının canlı nümunəsinə çevrilib. 40 yaşlı veteran futbolçu doğma klubu “Real Oviedo”nu illər sonra La Liqaya çıxarmağı bacardı və bununla da həm öz karyerasının, həm də klub tarixinin ən təsirli səhifələrindən birini yazdı.
Kazorla ilə “Oviedo” arasında bağlılıq hələ 2012-ci ildə başlayıb. Həmin il maliyyə çətinlikləri ilə üz-üzə qalan “Real Oviedo”nun iflas etməməsi üçün Kazorla öz cibindən kluba maddi yardım göstərmişdi. Bu jesti ilə o, uşaqlıq komandasına olan sevgisini sözlə deyil, əməllə nümayiş etdirmişdi.
2023-cü ildə isə o, karyerasının son illərini məhz bu komandada keçirmək qərarı aldı və “Oviedo”ya qayıtdı. O zaman Kazorla “Maaş istəmirəm” demişdi. Lakin qaydalara görə minimum əməkhaqqı almaq məcburiyyətində qaldı. Yenə də öz şərtini irəli sürdü: forma satışından gələn gəlirin 10 faizi klubun akademiyasına yönəldilsin.
Bu mövsüm Kazorla “Oviedo” ilə La Liqa yolunda möhtəşəm bir hekayə yazdı. Təcrübəli futbolçu “play-off” finalında qol vuraraq komandasının La Liqaya yüksəlməsində əsas pay sahibi oldu. Beləliklə, həm klubun 23 illik gözləntisinə son qoyuldu, həm də Kazorla uşaqlıq arzularını reallaşdırdı.
Santi Kazorla bu addımı ilə sadəcə oyunçu yox, klubuna bağlılıq nümunəsi, futbolun mənəvi dəyərlərinin qoruyucusu olduğunu bir daha sübut etdi.
