"Qarabağ"ın futbolçusu Bəhlul Mustafazadə Avropa Liqasında "Hekken"i məğlub edərək pley-offa yüksəldikləri matçdan (2:1) sonra jurnalistlərə açıqlama verib. 90plus.az xəbər verir ki, müdafiəçi əvvəlcə oyunun çətin keçdiyini deyib: “ Gərgin oyun oldu. İkinci hissənin çoxunu azlıqda keçirdik. Buna baxmayaraq, qələbə qazanmaq istəyirdik və qazandıq. Qələbə ilə birlikdə pley-offa vəsiqə qazana bildik. Çox böyük xoşbəxtlik keçiririk. Bunun davamını gətirmək üçün çalışacağıq”. O, pley-offda arzuladığı rəqibi də qeyd edib: “Arzum, əlbəttə ki, “Milan”la oynamaqdır, amma fərq etməz hansı gələcək. Hamısı güclü rəqiblərdir. Hansı ilə düşsək, maksimum nəticə üçün çalışacağıq”. Qeyd edək ki, 10 xalla qrupu 2-ci pillədə başa vuran "Qarabağ" 1/16 finalda bu komandalardan birinə rəqib olacaq: “Qalatasaray” (Türkiyə), “Lans” (Fransa), “Braqa” (Portuqaliya),  “Benfika” (Portuqaliya),  “Feyenoord" (Niderland), “Yanq Boyz" (İsveçrə), "Milan" (İtaliya)  "Şaxtyor"a (Ukrayna). Bu mərhələnin püşkatma mərasimi dekabrın 18-də keçiriləcək.