Bu gün Asiyanın ən nüfuzlu klub turniri – Asiya Çempionlar Liqasının Elit turniri üçün püşkatma mərasimi keçirilib.

90plus.az xəbər verir ki, İranın çempionu və Superkubok qalibi Təbrizin “Traktor” klubu da turnirdə iştirak edəcək. Bu mövsüm yarışda ümumilikdə 24 komanda mübarizə aparacaq və onlar coğrafi prinsiplə “Qərb” və “Şərq” zonalarına bölünüblər. Hər zonada 12 komanda iştirak edəcək və qruplar əvəzinə vahid turnir sistemi ilə oynayacaqlar.

Hər komanda 8 oyun keçirəcək, nəticələrə əsasən isə hər zonadan ən yaxşı səkkiz komanda 1/8 finala yüksələcək.

 1/8 finalda komandalar yalnız öz zonalarındakı rəqiblərlə üz-üzə gələcək, 1/4 finaldan etibarən isə “Qərb” və “Şərq” zonalarının komandaları qarşılaşacaq.

Turnirin 1/4 final, yarımfinal və final mərhələləri gələn il aprelin 17-25-də Səudiyyə Ərəbistanında keçiriləcək.

Püşkatma nəticəsinə görə, “Traktor” “Qərb” zonasında ev oyunlarını “Əl-Sədd” (Qətər), “Əl-Şorta” (İraq), “Əl-Duhail” (Qətər) və “Əl-Vahda” (BƏƏ) ilə keçirəcək. Səfərdə isə “Şabab Əl-Əhli” (BƏƏ), “Nasaf” (Özbəkistan), “Şarja” (BƏƏ) və “Əl-Qarafa” (Qətər) ilə üz-üzə gələcək.

Turnir sentyabrın 15-də start götürəcək.

Hazırkı qalib Ərəbistanın “Əl-Əhli” klubudur. Qeyd: Ötən mövsüm tarixdə ilk dəfə İran çempionu olan “Traktor” ölkəni Elit turnirdə tək təmsil edəcək. Təbriz klubu əvvəlki mövsümdə Asiya Çempionlar Liqası 2-də 1/4 finaladək irəliləmişdi.