Dambrauskasdan “Qarabağ” qələbəsinə reaksiya: “Bu oyun akademiyalarda göstərilə bilər”.

90plus.az xəbər verir ki, Azərbaycan Premyer Liqasının 28-ci turunda səfərdə “Qarabağ”ı 1:0 hesabı ilə məğlub edən Sabah klubunun baş məşqçisi Valdas Dambrauskas oyundan sonra həm nəticəni, həm də komandasının çıxışını yüksək qiymətləndirib.

Litvalı mütəxəssis qələbənin çətinliyini xüsusi vurğulayaraq deyib:

“Çox güclü rəqibin meydanında, avrokuboklarda qrup mərhələsi oynamış komandaya qarşı qalib gəlmək çox çətindir. Oyunçularımı təbrik edirəm, böyük iş gördülər.”

“İkinci hissə nümunəvi futbol idi”

Dambrauskas oyunun gedişinə də toxunub və xüsusilə ikinci hissədə komandasının performansını fərqləndirib:

“İkinci hissədə komandamın reaksiyası xoşuma gəldi. Hesabda öndə olmağa layiq idik. Rəqibə demək olar ki, heç nə vermədik. Bu, nümunəvi oyun idi — hətta məşqçilər kurslarında göstərilə biləcək səviyyədə.”

Onun sözlərinə görə, qələbənin əsas açarı taktiki detallardan çox mental hazırlıq olub:

“Taktikadan çox iki şey önəmlidir: ürəyini meydanda qoymaq və adın üçün oynamaq. Əgər qaçmırsansa, fokuslanmırsansa, taktika işləməz.

Taktiki çox şey danışa bilərsən. Amma oyunçular qaçmayacaqlarsa, fokuslanmayacaqsa, oyuna köklənməyəcəklərsə, xeyri olmayacaq. Bir də formalarındakı adlarıdır. Bunun üçün oynamalıdırlar. Elə etməlidirlər ki, ailələri, övladları, hər kəs onlarla qürur duysun. Bu qrup futbolçuları məşq etdirməkdən məmnunam. 26-27 oyundur ki, uduzmuruq. Sizi bizim məşqlərə dəvət etsəm, görərsiniz ki, bəzən məşqlərdəki intensivlik, mübarizlik oyunlardakından da çox olur. Bu davranış belə qələbələrdə açardır. Hamısı mənim oyunçularımın əməyidir. Düzdür, "Qarabağ" ötürmələri verdikdən sonra cinahlarda ikiyə iki qaldıqda heç bir oyunçularımızı keçə bilmədilər.

“26–27 oyundur uduzmuruq”

Dambrauskas komandasının sabit forması ilə bağlı da maraqlı rəqəm səsləndirib:

“Biz 26–27 oyundur uduzmuruq. Məşqlərdə bəzən intensivlik oyunlardan da yüksək olur. Bu, uğurun əsas səbəbidir.”

O, həmçinin “Qarabağ”ın hücum gücünü də etiraf edib:

“Onlar çox sadə epizodlardan vəziyyət yarada bilən komandadır. Amma bu gün cinahlarda onları dayandıra bildik.”

Avrokuboklar və hədəflər

“Sabah”ın Avropadakı perspektivləri barədə danışan məşqçi isə diqqəti dəyişmək istəməyib:

“Hazırda Avropa haqqında düşünmürük. Bizim üçün əsas çərşənbə günü keçiriləcək kubok oyunudur. Finala yenidən çıxmaq istəyirik.”

Zədə və heyət

Dambrauskas oyun zamanı zədələnən futbolçu barədə də məlumat verib:

“Mikelsi xəstəxanaya aparıblar. Zədəsi ciddi görünür, vəziyyəti daha sonra bilinəcək.”

“Abdulla bizim üçün nümunədir”

Məşqçi Abdulla Xaybullayev haqqında da xüsusi danışıb:

“O, bizim üçün çox vacib futbolçudur. 

Abdulla məşqdə təkcə ürəyini yox, bədənin bütün hüceyrələrini verir. Çox yaxşı oynayır, çox səbirli oyunçudur. Ona ehtiyacımız olduğu vaxtda meydançada 100 yox, 110 faizini verəcək biridir. Hamıya deyirəm ki, hazır olsunlar, o fürsəti istifadə etsinlər. Bilirdik ki, Umarali bu gün oynamayacaq. Abdulla da bu fürsətdən yaxşı istifadə etdi. O, bizim üçün nümunəvi oyunçudur. İkinci hissədə bir balaca bizə zərər verdi, 10 nəfərlə qaldıq. Qırmızı vərəqələr, səhvlər futbolun bir parçasıdır. Amma heç vaxt oyunçularımızı günahlandırmırıq, çalışırıq ki, onların səhvlərini düzəldək, düzgün yolu onlara göstərək. Fikrimcə, Abdulla komandamızın önəmli oyunçusudur.

Dambrauskas ümumilikdə komandasının xarakterini belə yekunlaşdırıb:

“Qələbə təkcə taktika deyil. Bu, ruh, mübarizə və inamdır. Bu gün bunu meydanda göstərdik.”