“Liverpul”un hücumçusu Dioqo Jota və onun qardaşı Andre Silvanın həyatını itirdiyi faciəli avtomobil qəzası ilə bağlı detallar üzə çıxıb.
90plus.az xəbər verir ki, qəza yerli vaxtla cümə axşamı gecə saat 00:30 radələrində İspaniyanın Samora bölgəsində baş verib.
BBC yazır ki, onların idarə etdiyi Lamborcini avtomobili başqa bir nəqliyyat vasitəsini ötməyə çalışarkən təkərin partlaması səbəbindən yoldan çıxıb və yanmağa başlayıb.
VİDEO: https://t.me/doxsanplus/104803
Dioqo Jota 28 yaşında idi, onun qardaşı, “Penafiel”də çıxış edən peşəkar futbolçu Andre Silva isə 26 yaşında. Jota cəmi bir ay əvvəl uzun müddət birlikdə olduğu Rute Kardozu ilə ailə qurmuşdu və cütlüyün üç uşağı vardı.
Portuqaliyanın baş naziri Luis Montenegro “Liverpul”un futbolçusu Jotanın avtomobil qəzasında həlak olması ilə bağlı faciəli xəbərə reaksiya verib.
“Portuqaliyanın adını böyük şərəflə təmsil edən idmançı Dioqo Jotanın və onun qardaşının ölümü xəbəri gözlənilməz və faciəlidir,” — Montenegro BBC-nin sitat gətirdiyi açıqlamada deyib.
“Mən ailələrinə dərin hüznlə başsağlığı verirəm. Bu, futbol və milli, beynəlxalq idman üçün kədərli gündür.”
Jota Portuqaliya millisində 49 oyun keçirib, 14 qol vurub və komandasının 2019 və 2025-ci illərdə Millətlər Liqasını qazanmasına kömək edib. Onun son oyunu 2025-ci ildə İspaniya üzərində final qələbəsi olmuşdu.
UEFA da Dioqo Jotanın faciəli ölümünə münasibət bildirib.
Avropa futbolunun idarəedici orqanı təsdiqləyib ki, UEFA Qadınlar Avro-2025-in cümə axşamı və cümə günü keçiriləcək bütün oyunlarında bir dəqiqəlik sükut olacaq.
“Avropa futbol ailəsi adından Portuqaliya millisinin və ‘Liverpul’un hücumçusu Diogo Jotanın və onun qardaşı Andre Silvanın faciəli vəfatını eşitməkdən dərin kədərlənirik.
Düşüncələrimiz onların ailəsi, dostları, komanda yoldaşları və bu ürəkağrıdıcı itkidən təsirlənən hər kəslədir.
Bu gün və sabah keçiriləcək bütün UEFA Qadınlar Avro-2025 oyunlarında Portuqaliya millisinin üzvü və ‘Liverpul’un futbolçusu Diogo Jota və onun qardaşı Andre Silvanın əziz xatirəsinə bir dəqiqəlik sükut olacaq.”
“Real Madrid” də Dioqo Jota və Andre Silvanın ölümündən sonra rəsmi açıqlama yayıb:
“‘Real Madrid’ CF, onun prezidenti və idarə heyəti ‘Liverpul’un futbolçusu Dioqo Jotanın və ‘Penafiel’in oyunçusu Andre Silvanın ölümündən dərin kədər hissi keçirir.
‘Real Madrid’ onların ailələrinə, yaxınlarına, komanda yoldaşlarına və klublarına başsağlığı və dəstək ifadə edir.
‘Real Madrid’ bütün futbol azarkeşlərinin bu böyük kədərinə şərik olur. Ruhları şad olsun.”
