"Qarabağ"ın futbolçusu Toral Bayramov "Hekken"i məğlub etdikləri matçdan (2:1) sonra jurnalistlərə açıqlama verib. 90plus.az xəbər verir ki, oyunçu qürur duyduğunu bildirib: “ Açığı, indi deməyə söz tapmıram. Çox sevindik. Çox istəyirdik ki, Avroliqada mübarizəmizi davam etdirək. Oyuna yaxşı hazırlaşmışdıq. Məşqçinin tapşırıqlarını yerinə yetirdik. Şükürlər olsun ki, azarkeşlərimizi və bütün Azərbaycan xalqını sevindirə bildik. Komandamla qürur duyuram.” O, pley-offda rəqibin kimliyindən asılı olmayaraq sonadək mübarizə aparacaqlarını deyib: “ Hansı komanda olursa olsun, oyunumuzdan əl çəkən deyilik. Qarşımızdakı məqsəd o komdanı keçmək olacaq. Əlimizdən gələni edəcəyik ki, bacardığımız qədər irəli gedək. İnşallah ki, qismətə hansı düşərsə, onunla oynayarıq”. 22 yaşlı futbolçu baş məşqçi Qurban Qurbanovun paltardəyişmə otağında sevincini bölüşməsindən də söz açıb: “ Təbrik etdi. Tarixi uğuru sevincli kəlmələri ilə bizimlə bölüşdü, hamımızı öpdü, bağrına basdı. Bizimlə qürur duyduğunu dedi”.