Misli Premyer Liqasının 20-ci turunda “İmişli” doğma azarkeşləri önündə “Qarabağ”a 0:1 hesabı ilə uduzduqdan sonra meydan sahiblərinin baş məşqçisi Jorj Kaşkilya mətbuat konfransında jurnalistlərin suallarını cavablandırıb.
90plus.az xəbər verir ki, Kaşkilya bunları deyib:
"Çox çətin və mübarizəli oyun getdi. Hər iki komanda qələbə qazanmaq istəyirdi. Komandam bu gün taktiki cəhətdən yaxşı oyun göstərdi. “Qarabağ”ın hücum xəttinin qarşısını ala bilirdik. İkinci hissədə standart vəziyyətdə bir səhv qolla nəticələndi. Bu da qələbə qolu oldu. Komandamın oyunundan razı qaldım. “İmişli” yaxşı oynadı, sona qədər mübarizə apardı. Məğlubiyyət futbolun bir hissəsidir. Heç-heçə daha ədalətli nəticə olardı.
Baş məşqçi tribunalardakı ab-havaya da münasibət bildirib. Quba Olimpiya İdman Kompleksində toplaşan azarkeşlərin böyük hissəsinin rəqibi dəstəkləməsi barədə suala Kaşkilya belə cavab verib:
"Elə də böyük neqativ təsiri yox idi. İlk dəfədir ev oyunumuza bu qədər azarkeş gəlir. Onların “Qarabağ”ı dəstəkləməsi bizim oyunçulara motivasiya verirdi. Bizə heç bir problem yaratmadı".
Mütəxəssis Dioqo Almeydanın qırmızı vərəqə almasına da toxunub:
"Oyundan sonra epizodu təhlil edəcəyik. Almeyda barədə tədbir görüləcək".
Qonaq komandanın baş məşqçisi Qurban Qurbanov isə matçdan sonra meydançanın vəziyyəti ilə bağlı narazılığını ifadə etmişdi. Bu barədə verilən suala “İmişli”nin çalışdırıcısı belə cavab verib:
"Meydançanın vəziyyətinə baş məşqçi cavabdeh deyil. Bu sual rəhbərliyə verilsə, daha yaxşı olar".
Futbolçuların da ot örtüyündən narazı olub-olmaması ilə bağlı suala isə o, daha sərt reaksiya verib:
"Qurban Qurbanov kimi məşqçi burada sadəcə bir oyun keçirəndən sonra belə narazılıq edibsə, bizim futbolçular razı qalarlar? Burada 16-17 oyun keçirməliyik. Əlbəttə ki, meydaçanın təsiri böyükdür. Ötən oyunda Yau Mozes, bu gün Mehdi Tahirov zədələndi. Futbolçular da meydançanın təsirini hiss edirlər. Burada oynamağımız nə məndən, nə də oyunçulardan asılıdır. Əlimizdən gələni etməliyik".
