“Karvan-Yevlax”ın baş məşqçisi Füzuli Məmmədov Misli Premyer Liqasının 20-ci turunda “Zirə”yə 0:1 hesablı məğlubiyyətdən sonra oyunu dəyərləndirib.

90plus.az xəbər verir ki, təcrübəli mütəxəssis matçdan sonra təşkil olunan mətbuat konfransında bildirib:

“Yaxşı mübarizə və maraqlı oyun alındı. Güclü rəqibə qarşı oynadıq, amma biz də yaxşı mübarizə apardıq. Standart vəziyyətdən qol buraxdıq. Oyunun sistemində dəyişiklik etdik, daha çox hücum etməyə başladıq, lakin qol vura bilmədik.

Epizodların reallaşdırılmasında futbolçuların ustalığı mühüm rol oynayır. Hazırda çətin vəziyyətdəyik. Belə şəraitdə komandanı motivasiya etmək asan deyil. Ümidimizi itirmirik. Rəhbərlik bizi dəstəkləyir. Bu gün ən azı bir xal qazana bilərdik, amma bunun üçün qol vurmaq lazım idi”.

Baş məşqçi ilk hissədə meydan sahiblərinin cərimə meydançasında yaşanan mübahisəli vəziyyətə də münasibət bildirib:

“Orada dirsəklə zərbə var idi, amma hakimlərin bu cür epizodları necə qiymətləndirdiyini bilmirəm. Hakimlərə daha yaxşı görünür”.