"Fənərbağça"dan ayrılan Joze Mourinyo Rusiyaya gedə bilər – illik 20 milyon avro tələb edir.
90plus.az xəbər verir ki, dünyaca məşhur portuqaliyalı baş məşqçi Joze Mourinyo karyerasını Rusiyada davam etdirməyə hazırlaşır. "Fənərbağça"dan ayrıldıqdan sonra bir müddət istirahətdə olan təcrübəli mütəxəssisin agentləri vasitəsilə Rusiya Premyer Liqası klubları ilə ilkin təmaslara başladığı bildirilir.
"EuroFootball"un məlumatına görə, Mourinyo Rusiyada çalışmaq fikrinə müsbət yanaşır, lakin bunun üçün müəyyən şərtləri var. İddialara əsasən, o, ən azı 2 illik müqavilə ilə yanaşı, köməkçi heyəti ilə birlikdə illik 20 milyon avro qarantili maaş tələb edir.
Mourinyo bu yay "Fənərbağça"nın UEFA Çempionlar Liqasının seçmə mərhələsində "Benfika"ya məğlub olmasından sonra klubla yollarını ayırmışdı.
Hazırda 61 yaşlı mütəxəssisin hansı Rusiya klubu ilə danışıqlar apardığı dəqiq bilinməsə də, iddialar onun qısa zamanda futbola qayıda biləcəyini göstərir.
