Neymarın son dəqiqələrdə vurduğu qol “Santos”a Braziliya A Seriyasında lider “Flamenqo” üzərində 1:0 hesablı vacib qələbə qazandırıb.
90plus.az xəbər verir ki, bu gecə keçirilən qarşılaşmada sabiq “Barselona” və “PSJ” hücumçusu mövsümdə ilk qolunu vurub. O, 84-cü dəqiqədə Gilyermenin ötürməsini qəbul edərək zərif dönmə hərəkəti ilə topu uzaq küncə göndərib.
Bu qol Neymar üçün xüsusi əhəmiyyət daşıyır. Çünki o, bu mövsüm ard-arda əzələ zədələri, xüsusilə də ötən ilin oktyabrında sol dizindən ön çarpaz bağların qopması ilə bağlı uzun fasilədən sonra yaşıl meydana qayıdıb.
Formadan uzaq qaldığına baxmayaraq, Neymarın son anda vurduğu qələbə qolu “Santos” üçün çox önəmli olub. Bu nəticə ilə komanda turnir cədvəlində “Flamenqo”dan olan xal fərqini 13-ə endirib.
Neymar qələbə qolundan sonra: “Hər oyunda 90 dəqiqə oynamaq istəyirəm. Fiziki cəhətdən daha yaxşı olmaq istəyirəm, amma bu həm oyun, həm də məşq baxımından vaxt tələb edir.”
“Bədənim yenidən hər şeyə uyğunlaşır, əvvəlki ritmini tapmağa çalışır. Mənim keçirdiyim zədədən sonra bu proses asan deyil.”
O, həmçinin rəqibi də yüksək qiymətləndirib: “Flamenqo liqanın ən yaxşı komandasıdır. Onların taktiki gücü çox təsir edicidir,” – deyə Neymar əlavə edib.
