UEFA Avropa Liqasının 1-ci təsnifat mərhələsində "Zirə"-"Şerif" arasında baş tutan cavab oyunundan sonra “Zirə”nin baş məşqçisi Rəşad Sadıqov açıqlama verib.

90plus.az xəbər verir ki, R.Sadıqov açıqlamasında belə qeyd edib:

"Oyunu şərh etmək çox çətindir. Matçı iki hissəyə bölməliyik. Qırmızı vərəqəyə qədər olan hissə və ondan sonra. Qırmızı vərəqəyə qədər hər şey istədiyimiz kimi keçirdi.

Qapımızda təhlükəli hücum imkanı vermirdik. Hesabda da irəlidə idik. Rəqib daha böyük qüvvə ilə irəli atılırdı. Bu dəqiqələrdə daha təmkinli oynayıb, əks-hücumda hesabı artırmaq istəyirdik. Təəssüflər olsun ki, heç nədən qırmızı vərəqə aldıq. İlk yarının sonlarında rəqibin üzərimizdə böyük üstünlüyü yarandı. İlk hissədən sonra müəyyən dəyişikliyə getdik. Uşaqlar yaxşı, əzmkar mübarizə apardılar. Təhlükəli də olurduq. Məyusedici məqam odur ki, rəqibə epizod vermədən qol buraxdıq. İkisi də ən çox çəkindiyim ikinci mərtəbədən oldu. Oyun epizodundan isə qol imkanı vermədik. Məyusuq. Amma məğlubiyyət bizim böyüməyimizə səbəb olacaq. Düşdüyümüz vəziyyəti düzgün təhlil etsək, təbii ki. Uşaqlarla qürur duydum. 10 nəfərlə mübarizə aparmaq çox çətin idi. Qol epizodu vermirdik. Məğlubiyyəti unudub, qarşıdakı oyuna hazırlaşmalıyıq".

Qeyd: İlk matçda 1:0 hesablı qələbə qazanan "Zirə" "Şerif"lə son oyunda (1:2) penaltilər seriyasında məğlub olaraq (4:5) Avropa Liqasında mübarizəni dayandırıb.