“Qarabağ”ın “Bayer” klubu ilə görüşü öncəsi Ağdam təmsilçisinin prezidenti Tahir Gözəl ürək sözlərini deyib. 90plus.az klubun media hesabına istinadən xəbər verir ki, Gözəl Bakıdakı vacib konfransa qatıldığı üçün Leverkuzendəki matça yollanmasa da, komandaya uğurlar arzulayıb: “ Qurban Qurbanov və bütün futbolçulara uğurlar arzulayıram. Bakıda keçirilən oyunda qeydə alınan 2:2 hesablı heç-heçə göstərir ki, qələbə üçün gücümüz, imkanımız var. Qarşımızda çox nəhəng komanda var. Amma nəticədən asılı olmayaraq, “Qarabağ”ın öz oyununu, öz gücünü göstərməsi, nümayiş etdirdiyi futbolla alqış qazanması vacibdir”.  Tahir Gözəl "Qarabağ"ın əzmkar mübarizə aparmalı olduğunu vurğulayıb: “ Tarixi gündə möhtəşəm mübarizədə qarşımızda nəhəng rəqib olsa da, özünə inanan güclü “Qarabağ” var. Komandamız mübariz ruhunu, əzmkarlığını göstərməlidir. Məğlubiyyət qorxulu deyil, bütün çempionlar uduzur. Əsas böyük ürəyin, mübarizliyin olmasıdır. Azarkeşlər, bizi sevənlər, bütün Azərbaycan görməlidir ki, meydanda iki böyük komanda mübarizə aparır”. Qeyd : "Bayer” – “Qarabağ” oyunu bu gecə Bakı vaxtı ilə saat 00:00-da başlayacaq.