Avropa Liqasının pley-off mərhələsində "Braqa" ilə üz-üzə hələcək "Qarabağ"ın səfər proqramı bəllidir. 90plus.az xəbər verir ki, "Köhlən Atlar" oyundan 2 gün əvvəl Portuqaliyaya gedəcək. "Qarabağ" Bakıdan çarter reysi ilə fevralın 13-ü saat 17:00-da yola düşəcək və saat 23:50-də - Portuqaliya vaxtı ilə saat 19:50-də Portu şəhərinə eniş edəcək. Çünki Braqa şəhərinin hava limanı beynəlxalq reysləri qəbul edə bilmir. Odur ki, "Qarabağ" əvvəlcə Portuya getməli olacaq. Oradan da avtobusla Braqa şəhərinə yola düşəcək. Bu isə əlavə 1 saatlıq vaxt deməkdir.  Beləliklə, "Qarabağ" Braqaya çatmaq üçün ümumilikdə 7 saat 50 dəqiqə yol gedəcək. Oyundan bir gün əvvəl isə "Qarabağ" matçın keçiriləcəyi "Eştadio Munisipal de Braqa" stadionunda məşqə çıxacaq. Məşqdən əvvəl Qurban Qurbanovun mətbuat konfransı olacaq. "Braqa" - "Qarabağ" oyunu fevralın 15-i saat 20:00-da (Bakı vaxtı ilə gecə 00:00-da) start götürəcək.