Qurban Qurbanovdan Qubadakı meydançaya sərt mesaj: “Belə futbol olmaz”.
90plus.az xəbər verir ki, Misli Premyer Liqasının 20-ci turunda “Qarabağ” səfərdə “İmişli”ni 1:0 hesabı ilə məğlub etsə də, matçdan sonra əsas müzakirə mövzusu nəticə yox, meydançanın durumu oldu.
Oyundan sonra mətbuat konfransında danışan “Qarabağ”ın baş məşqçisi Qurban Qurbanov Quba şəhər stadionunun ot örtüyünü kəskin tənqid edib. Təcrübəli mütəxəssis bildirib ki, belə şəraitdə futbol oynamaq həm keyfiyyətə, həm də futbolçuların sağlamlığına ciddi təsir göstərir.
Qurbanov meydançanın durumunun komandasının oyun planını pozduğunu gizlətməyib:
“Meydança yox idi ki… Belə meydançada futbol oynamağa necə icazə verilir, başa düşmürəm. Futbolçular ikiqat güc sərf etdilər. Oturub gözləyirdim ki, oyun nə vaxt bitəcək.”
Baş məşqçi xüsusilə qarşıdakı avrokubok matçını nəzərə alaraq narahatlığını ifadə edib. “Qarabağ”ın növbəti rəqibi İngiltərə təmsilçisi “Nyukasl” olacaq. Qurbanovun sözlərinə görə, komanda son iki görüşdə normal hazırlıq keçə bilməyib:
“Belə meydançada ‘Nyukasl’la oyuna necə hazırlaşım? Futbolçuları 3-4 gün bərpa etməli olacağıq.”
53 yaşlı mütəxəssis “İmişli” klubuna da etirazını gizlətməyib. Onun fikrincə, komanda Bakıda məşq edib Qubada oynayırsa, bu, suallar doğurur:
“Başa düşürəm ki, yeni komandadır, stadionu yoxdur. Amma burada oynayırlarsa, burada da məşq etsinlər. Bakıda məşq edib Qubada oynayırlar – onda Bakıda da oynasınlar.”
Qırmızı vərəqə epizoduna da toxunan Qurban Qurbanov hakim qərarlarını geniş şərh etməyib, lakin VAR müdaxiləsinin rol oynadığını vurğulayıb. O, stadionların vəziyyətinə nəzarətin gücləndirilməsinin vacibliyini qeyd edib.
Qeyd: Minimal hesablı qələbə sayəsində “Qarabağ” çempionluq yolunda vacib üç xal qazandı. Lakin görünən odur ki, Qubadakı oyun uzun müddət daha çox meydançanın durumu ilə yadda qalacaq.
