Avro-2032 İtaliyadan alına bilər: UEFA stadionlarla bağlı xəbərdarlıq etdi.
90plus.az xəbər verir ki, İtaliya “Avro-2032”yə ev sahibliyi hüququnu itirmək təhlükəsi ilə üz-üzədir. Buna səbəb ölkədə turnirin keçirilməsi üçün tələb olunan stadion standartlarının böyük hissəsinin hələ də qarşılanmamasıdır.
Hazırda yalnız Turin şəhərində yerləşən “Yuventus”un stadionu UEFA-nın bütün tələblərinə tam cavab verir. Roma, Milan (“San Siro”), Neapol və digər iri şəhərlərdəki arenalar isə ya köhnəlib, ya bürokratik əngəllərlə üzləşib, ya da yenidənqurma üçün maliyyələşmə təsdiqlənməyib.
UEFA prezidenti açıqlamasında İtaliyaya açıq xəbərdarlıq edib:
“Avro-2032 baş tutacaq. Amma infrastruktur hazır olmazsa, turnir İtaliyada keçirilməyəcək”.
Qeyd: “Avro-2032”nin İtaliya və Türkiyənin birgə ev sahibliyi ilə təşkili planlaşdırılır. Lakin İtaliyadakı problemlər aradan qaldırılmasa, turnirin tam şəkildə Türkiyəyə verilməsi ehtimalı gündəmə gələ bilər.
Hazırda UEFA vəziyyəti yaxından izləyir və yekun qərarın qarşıdakı illərdə stadion layihələrinin gedişatından asılı olacağı bildirilir.
