Hollandiya çempionluğunu liqanın son dönəmində dramatik şəkildə PSV Eyndhoven klubuna uduzan “Ayaks”da rəhbərlik dəyişiklik qərarı verdi. Komandanın italiyalı baş məşqçisi Françesko Farioli ilə yollar ayrıldı.

90plus.az xəbər verir ki, Niderland nəhəngi yeni baş məşqçisini rəsmi olaraq elan edib. Klubun açıqlamasına görə, son olaraq İngiltərənin “Liverpul” klubunda Arne Slotun köməkçisi olan Con Heytinqa “Ayaks”ın yeni baş məşqçisi təyin olunub.

“Bu fürsəti qazandığım üçün fəxr edirəm”

41 yaşlı mütəxəssis imzadan sonra verdiyi açıqlamada həyəcanlı olduğunu bildirib:

“Başlamaq üçün çox həyəcanlıyam. İngiltərədə keçirdiyim son illər mənim üçün çox faydalı oldu. Devid Moyes və Arne Slot ilə birgə işləmək özümü daha da inkişaf etdirməyə imkan verdi. İndi baş məşqçi kimi davam etməyə hazıram və ‘Ayaks’ mənə bu imkanı verdiyi üçün qürur duyuram.”

Yeni mövsümdə “Ayaks”ın əsas məqsədi uğursuzluğu arxada qoyaraq yenidən zirvəyə qayıtmaq olacaq. Heytinqanın bu missiyada necə çıxış edəcəyi böyük maraqla izlənəcək.