“Liverpul”un braziliyalı qapıçısı Alisson Bekker klubun Asiya turunu vaxtından əvvəl tərk edərək İngiltərəyə qayıdıb.

90plus.az xəbər verir ki, Alisson çərşənbə axşamı səhər Tokioda keçirilən açıq məşqdə iştirak etməyib və qısa müddət sonra braziliyalının Arne Slotun komandası ilə birlikdə olmadığını təsdiqlənib. Klub 32 yaşlı qolkiperə “şəxsi səbəblər”ə görə evə qayıtmaq icazəsi verib.

Alisson Asiya turunu yarımçıq tərk edən üçüncü “Liverpul” futbolçusudur. Daha əvvəl müdafiəçi Co Qomez Axil vətərində zədə səbəbilə, hücumçu Luis Dias isə “Bayern”ə keçidini yekunlaşdırmaq üçün İngiltərəyə dönmüşdü.

Premyer Liqanın son çempionu Asiya turunu çərşənbə günü “Yokohama F. Marinos”a qarşı oyunla başa vuracaq.